Քաղաքագէտը՝ «ԱԼԻՔ»-ի հետ զրոյցում. «Խաղաղութեան պայմանագիր» կը լինի միայն այն դէպքում, երբ Ադրբեջանը դա դիտարկի որպէս սեփական անվտանգութեան կարեւորագոյն բաղադրիչներից մէկը»

Ալիեւը յայտարարում է «Խաղաղութեան պայմանագրի» շուրջ իր նախապայմանների մասին, միջանցք է պահանջում եւ ոչ մի երաշխիք պատրաստ չէ տալ: Ինչպիսի քայլերով պէտք է արձագանգի Հայաստանը հարցին, քաղաքագէտ Բենիամին Մատթէոսեանը «ԱԼԻՔ»-ի հետ զրոյցում նշեց, որ եթէ անկեղծ լինենք, ապա մենք պէտք է ընդունենք, որ դրական կը լինէր, եթէ Ադրբեջանի հետ ինչ-որ փոխըմբռնման կանոններ լինէին:

«Այն իսկապէս աւելի ազդեցիկ կը լինէր պատերազմական գործողութիւններից, բայց որպէսզի այդ մակարդակի հասնել հնարաւոր լինի կամ Հայաստանի իշխանութիւնների լեզւով ասած «Խաղաղութեան պայմանագրի» համար անհրաժեշտ են ճիշտ քաղաքականութեան դրսեւորում, այն դէպքում, երբ Ադրբեջանը այդ պայմագիրը դրսեւորի, որպէս իր անվտանգութեան կարեւորագոյն բաղադրիչներից մէկը»,- ասաց նա:

Քաղաքագէտի խօսքով՝ հիմա Ադրբեջանը Հայաստանից վտանգ չի տեսնում, իրենք նկատում են, որ Հայաստանի տնտեսութիւնը այդքան չի զարգանում, որ որակական փոփոխութիւններ բերի բանակի կառուցւածքի ուղղութեամբ, որը կը յանգեցնի դրան, որ Ադրբեջանը համոզւած լինի, որ Հայաստանը կարող է յարձակւել օրինակ Շուշիի ուղղութեամբ՝ ազատագրելու համար ամբողջ Արցախը: «Իրենք, քանի որ վտանգ մեզանից չեն տեսնում, հետաքրքրւած չեն «Խաղաղութեան պայմանագիր» ստորագրելու մէջ»,- ասաց Մատթէոսեանը:

«Եթէ մենք ցանկանում ենք ունենալ այդ «Խաղաղութեան պայմանագիր»-ը այնպիսի ուժ պէտք է ներկայացնենք մեզանից, որ Ադրբեջանը ինքը հետաքրքրւած լինի մեզ հետ կնքելու այն: Ալիեւի վերջին հարցազրոյցը հէնց դրա մասին էր, որ ինքը Հայաստանից վտանգ չի տեսնում, եւ Նիկոլ Փաշինեանին չի դիտարկում հաւասար քաղաքական մրցակից ու փորձում է մաքսիմալը ստանալ Հայաստանից»,- նշեց քաղաքագէտը՝ յաւելելով՝ «Ալիեւի յայտարարութիւնները քաղաքագէտի խօսքով՝ փաստում են, որ իրենք շատ հեռու են «Խաղաղութեան պայմանագրի» ստորագրման պահից, դա իր հերթին նշանակում է, որ Նիկոլ Փաշինեանը քաղաքականապէս սնանկ գործիչ է, այդ մարդը Պրագայում Արցախը յանձնեց Ադրբեջանին, մեզ էլ Հայաստանում, Սփիւռքում համոզում էին, որ յանձնեցին Արցախը, որպէսզի ապահովագրեն Հայաստանի անվտանգութիւնը, բայց Ալիեւը ցոյց է տալիս, որ ոչ մի «Խաղաղութեան պայմանագիր» չի լինելու, հետեւաբար Նիկոլ Փաշինեանի քարոզչական թէզերը փուչիկ են եւ ինքը քաղաքականապէս սնանկ գործիչ է 2024 թւականի սկիզբը հէնց դա ապացուցեց:

Ինչպիսին կը լինի նրանց քաղաքականութիւնը այս տարի, քաղաքագէտն այս պահի դրութեամբ խուսափեց յստակ գնահատականներ տալուց, որովհետեւ դրանք «ծայր աստիճան յոռետեսական կը լինէին»»:

Անդրադառնալով Իրանի Իսլ. Հանրապետութեան վերջին նախաձեռնողականութեան յայտարարութիւններին՝ Թաւրիզում ՀՀ գլխաւոր հիւպատոսութիւն բացելու պատրաստակամութեան մասին, եւ հարցմանը, թէ արդեօք հայ-իրանական յարաբերութիւնների խորացման հերթական փուլը, ինչ ազդեցութիւն է կարող ունենալ «Խաղաղութեան պայմանագրում» հայկական շահը առաջ տանելու եւ Հայաստանի Հանրապետութեան ինքնիշխանութեան ապահովման ուղղութեամբ, Մատթէոսեանը դիտարկումը ամբողջացրեց, փորձելով մի փոքր աւելի գլոբալ դիրքորոշում ցուցաբերել. «Շատ կարեւոր է մեր փոխյարաբերութիւնները, ռազմավարական եւ բնական դաշնակիցների, այսինքն Ռուսաստանի Դաշնութեան եւ Իրանի Իսլամական Հանրապետութեան հետ, եթէ մենք կարողանայինք մեր փոխյարաբերութիւնները նոր մակարդակի բերել, Իրանի հետ մեր ռազմատեխնիկական փոխյարաբերութիւնները բարելաւել կամ մեր շահերի համընկման տիրոյթում համագործակցութիւնները խորացնել, ապա այն իսկապէս կը նպաստէր Հայաստանի Հանրապետութեան սուվերենութեան մակարդակի բարձրացմանը»:

«Գաղնիք բացայայտած չեմ լինի ասելով, որ Իրանի հետ պատմութեան ընթացքում պատերազմական շրջաններ ենք ունեցել, բայց ներկայ պահին քաղաքականապէս տգէտ պէտք է լինել եւ աշխարհաքաղաքական առումով բոբիկ՝ չհասկանալու համար Իրանը ինչ կարեւոր նշանակութիւն ունի Հայաստանի Հանրապետութեան ներկայիս դիրքերի պահպանման ուղղութեամբ: Եթէ Իրանը զօրք չկուտակէր Հայաստանի հետ սահմանին, ռուսական կողմն էլ որոշակի գործողութիւն չիրականացնէր ես վստահ չեմ, որ Ջերմուկը կը լինէր հայկական կողմի վերահսկողութեան ներքոյ»,- նշեց նա՝ եզրակացնելով, որ քանի մենք ունենք իշխանութիւն, որ հայեացքները ուղղւած են դէպի Արեւմուտք, հետեւաբար մենք համապատասխան գործողութիւններ չենք կարողանում իրականացնել»:

Հարցազրոյցը՝ ՍԻՒՆԷ ՖԱՐՄԱՆԵԱՆԻ