Յակոբ Բադալեան. «Վտանգաւոր յայտարարութիւն, հիանալի եւ արագ կառուցւող «գործնական փաստարկ»՝ Թուրքիային»

Քաղաքական վերլուծաբան Յակոբ Բադալեանը «Ֆէյսբուք»-եան իր էջում գրում է․

«ԱԺ պաշտպանութեան, ներքին գործերի եւ անվտանգութեան հարցերի յանձնաժողովի նախագահ Անդրանիկ Քոչարեանը արել է շատ վտանգաւոր յայտարարութիւն: Նրա խօսքով, վարչապետն իբրեւթէ ուզում է անուն առ անուն հաւաքել ցեղասպանութեան ենթարկւած մեր 1,5 միլիոն հայրենակիցների անուն-ազգանունները, նրանց հետ կատարւածի տեղը, վայրը եւ այլն՝ յիշատակը ամբողջութեամբ յաւերժացնելու համար:

Առերեւոյթ կարող է թւալ, թէ սա կարեւոր նախաձեռնութիւն է: Եւ գուցէ իսկապէս կարեւոր է, եթէ այդ նախաձեռնութեան մասին չբարձրաձայնւի ոչինչ, բացարձակապէս ոչինչ, իսկ այն շատ շատ ներքին կարգով պարզապէս յանձնարարւի ԳԱԱ որեւէ կառոյցի, թէկուզ Ցեղասպանութեան թանգարան ինստիտուտին, որպէս գիտական, ոչ թէ պետական աշխատանքի առարկայ:

Երբ այդ աշխատանքը բարձրաձայնւում է, այն էլ պետականօրէն, ապա դրանով ստեղծւում է մի «փաստարկի» հիմք, թէ՝ ցեղասպանութեան զոհերի թիւը այնքան է, որքան կայ անուն:

Բոլորն են թերեւս պատկերացնում, թէ անուն առ անուն 1,5 միլիոն մարդու պատմութիւն վերականգնելը, աւելի քան հարիւր տարի անց, բազմաթիւ օբիեկտիւ ու սուբիեկտիւ հանգամանքների եւ իրողութիւնների, նաեւ Հայաստան պետութեան ինքնուրոյն կարողութիւնների սահմանափակւածութեան պարագայում՝ երբ արխիւների գերակշռող մասը թերեւս այլ պետութիւններում են, ինչ ահռելի գործ է: Եւ թերեւս դժւար չէ պատկերացնել, թէ անգամ իրադարձութիւնների ամենաբարենպաստ դասաւորութեան պայմաններում ինչ հսկայական ժամանակ է պահանջելու այդ գործը, կրկնեմ, եթէ ինչ որ իդէալական դասաւորութեան պայմաններում հնարաւոր լինի տեսականօրէն աւարտել այն երբեւէ:

Իսկ մինչ այդ, հիանալի եւ արագ կառուցւող «գործնական փաստարկ» է ստանալու Թուրքիան:

Եւ մնում է միայն տարակուսել, որ այդ փաստարկի «նախերգանքը» հնչում է ցեղասպանութեան տարելիցից տասն օր առաջ»: