Գալուզին. «Արեւմուտքը Հայաստանը դիտարկում է որպէս Ռուսաստանի դէմ հիբրիդային պատերազմի գործիք»
«ԱԼԻՔ» – Հայաստանի անցումը ԱՄՆ-ի եւ ՆԱՏՕ-ի «հովանոցի» տակ անհնարին կը դարձնի Ռուսաստանի Դաշնութեան հետ եւ ՀԱՊԿ-ի շրջանակներում միասնական պաշտպանական տարածքի պահպանումը։ Այս մասին ըստ [Yerevan.today](blocked)-ի՝ «Կոմսոմոլսկայա պրաւդա»-ին ասել է ՌԴ փոխարտգործնախարար Միխայիլ Գալուզինը։
«Անվտանգութեան ոլորտում Հայաստանի ինքնիշխանութեան հետագայ քայքայումը եւ ԱՄՆ-ի ու ՆԱՏՕ-ի «թղթէ հովանոցի» տակ արեւմտեան օրինաչափութիւնների անցումը պարզապէս անհնարին կը դարձնի Ռուսաստանի հետ եւ ՀԱՊԿ-ի շրջանակներում միասնական պաշտպանական տարածքի պահպանումը»,- ասել է նա։
Ինչպէս նշել է ՌԴ ԱԳՆ ղեկավարի տեղակալը, արեւմտեան նարատիւների ազդեցութեան տակ տեղի է ունեցել երկկողմ քաղաքական շփումների կտրուկ նեղացում։
«Երեւանից գնալով աւելի յաճախ են հնչում Ռուսաստանի, ՀԱՊԿ-ի եւ անվտանգութեան գործող համակարգի անհիմն քննադատութիւնները։ Սա, մեղմ ասած, ապակառուցողական է եւ անհեռատես»,- ասել է Գալուզինը։
Նրա կարծիքով՝ Երեւանի լիարժէք մասնակցութիւնը ՀԱՊԿ-ի աշխատանքներին համապատասխանում է հայ ժողովրդի ձգտումներին եւ ծառայում է Հարաւային Կովկասում խաղաղութեան եւ կայունութեան պահպանման գործին։
«Ինչ էլ խոստանան արեւմտեանները, որոնք դրդեցին Հայաստանի իշխանութիւններին «սառեցնել» մասնակցութիւնը Կազմակերպութեանը, ՀԱՊԿ-ին որպէս Հայաստանի անվտանգութեան ապահովման մեխանիզմ այսօր արդիւնաւէտ այլընտրանքներ չկան»,- վստահ է ռուս դիւանագէտը։
ՀԱՊԿ-ի ներուժի կառուցման ուղղութեամբ աշխատանքները համակարգւած են ընթանում՝ Երեւանը թողնելով յետեւում, ասել է ՌԴ փոխնախարարը։
«Մշակւում են ճգնաժամային արձագանգման նոր ալգորիթմներ, ամրապնդւում են կազմակերպութեան Հաւաքական ուժերի հնարաւորութիւնները՝ հաշւի առնելով ռուսական մարտական փորձը, եւ ընդունւում են լուրջ ծրագրային փաստաթղթեր Կենտրոնական Ասիայում մեր դաշնակիցների սահմանային անվտանգութիւնն ապահովելու համար»,- ասել է Գալուզինը։
Ինչպէս նշել է ռուս դիւանագէտը, Մոսկւան բազմիցս եւ տարբեր մակարդակներով յստակօրէն յայտնել է Երեւանին յուզող հարցերը քննարկելու իր պատրաստակամութիւնը։
«Նրանք ընդգծեցին, որ Մոսկւան հաւատարիմ է եղել եւ մնում է համաձայնութիւնների ողջ շրջանակին թէ’ երկկողմ մակարդակով, թէ’ ընդհանուր ինտեգրացիոն կառոյցների շրջանակներում, եւ չի հրաժարւել իր դաշնակիցների հանդէպ ստանձնած պարտաւորութիւններից։ Միաժամանակ, մեր տարբեր նախաձեռնութիւններին պատասխան չենք ստացել»,- ասել է ՌԴ փոխնախարարը։
Նրա խօսքով՝ Մոսկւան ակնկալում է, որ «Հայաստանի ղեկավարութիւնը կունենայ բաւականաչափ քաղաքական իմաստութիւն՝ հասկանալու Արեւմուտքի խոստումների պատրանքային բնոյթը եւ Ռուսաստանի հետ յարաբերութիւնների կարեւոր նշանակութիւնը՝ հանրապետութեան ինքնիշխանութեան, անվտանգութեան եւ տնտեսական զարգացման տեսանկիւնից»:
