ԵՄ-ն դժգոհ է Օրբանի՝ օկուպացւած Շուշիում ԹՊԿ գագաթնաժողովին մասնակցութիւնից

«ԱԼԻՔ» – Հունգարիայի վարչապետ Վիկտոր Օրբանը, որի երկիրը ներկայումս նախագահում է ԵՄ-ում, դժգոհութեան նոր ալիք է առաջացրել Բրիւսէլում՝ օկուպացւած Շուշիում Թուրքական պետութիւնների կազմակերպութեան ոչ պաշտօնական գագաթնաժողովին իր չհամաձայնեցւած մասնակցութեամբ: Հաղորդում է Tert.am-ը՝ Deutsche Welle-ին յղումով:

Աղբիւրը նշում է, որ այս մասին յայտարարել է ԵՄ արտաքին եւ անվտանգութեան քաղաքականութեան հարցերով բարձր ներկայացուցիչ Ժոզէպ Բորէլը:

Նշւել է, որ Օրբանի մասնակցութիւնը գագաթնաժողովին տեղի է ունեցել բացառապէս Հունգարիայի եւ այս կազմակերպութեան միջեւ երկկողմ յարաբերութիւնների շրջանակում: Բորէլի յայտարարութեան մէջ ընդգծւում է, որ Հունգարիան ԵՄ-ից մանդատ չի ստացել Թուրքական պետութիւնների կազմակերպութեան հետ յարաբերութիւնները խթանելու համար։

«Վարչապետ Վիկտոր Օրբանը Եւրոխորհրդից մանդատ չի ստացել  ներկայացնելու այն Թուրքական պետութիւնների կազմակերպութեան գագաթնաժողովում»,- գրել է Բորէլը։

Նշենք, որ յուլիսի 5-6-ը օկուպացւած Արցախի Հանրապետութեան Շուշիում կայացել է ԹՊԿ ոչ պաշտօնական գագաթնաժողովը, որին մասնակցել են Ադրբեջանի, Ուզբեկստանի, Ղազախստանի, Հունգարիայի ղեկավարները։

Հանդիպմանը հրաւիրւած էր նաեւ Հիւսիսային Կիպրոսի Թուրքական Հանրապետութեան նախագահ Էրսին Թաթարը։ Թուրքիան գագաթնաժողովին ներկայացնում էր փոխնախագահ Ջեւդեթ Եըլմազը։