Լիլիթ Գալստեան. «Ինչպէ՞ս դիմանալ եւ դիմակայել. սա է փոքր ազգերի եւ փոքր պետութիւնների մեծագոյն մարտահրաւէրը»
«ԱԼԻՔ» – ՀՅԴ Հայաստանի ԳՄ անդամ, ՀՀ ԱԺ «Հայաստան» խմբակցութեան պատգամաւոր Լիլիթ Գալստեանը ֆէյսբուքեան իր էջում անդրադարձել է 2024 թւականի ամառային Օլիմպիական խաղերի բացման արարողութեան դրական, եւ յատկապէս բացասական կողմերին.
«Օլիմպիական խաղերի բացման արարողութիւնն, անառկելիօրէն, բացառիկ էր, ստեղծագործական երեւակայութեան եւ յօրինւածքների թռիչքի իմաստով անպատկերացնելի, շնչառութիւն կտրող, ֆելինիական թափով․․․։ Որոշ հատւածներ դիտելիս անգամ յուզմունքից աչքերս խոնաւանում էին․․․
Այդպէս են մտածում մեծ եւ յաղթած պետութիւններում։
Աւաղ, այդ անսահման մասշտաբի կողքին` անթաքոյց էր, անգամ բացայայտօրէն պարտադրելի մեր ժամանակների արժէքային դեգրադացիան, սոդոմ-գոմորութիւնը, տրանսֆորմացիայի բացայայտ քարոզչութիւնը ․․․։
Այն ո՛չ հանդուրժողականութեան, ո՛չ բազմակարծութեան, ո՛չ մարդու իրաւունքների եւ ազատութիւնների, եւ ոչ էլ՝ բազմազանութեան համատեքստում չի տեղաւորւում։
Սա համամարդկային կարգերի եւ արժէքային կառոյցների հեգնանք է ու ծաղր, քրիստոնէութեան նշանային համակարգի անարգանք, մարդեղէնութեան նւաստացում։
Եւ այս ամէնը Փարիզի Աստւածանոր տաճարի խոնարհւած հայեացքի ներքոյ․․․․
Աւաղ, այսպիսին է առայժմ չկասեցւող գլոբալիզացիայի «քաղաքակրթական» ընթացքը։
Մեծերը մաքրւելու ներուժ ունեն։
Ինչպէ՞ս դիմանալ եւ դիմակայել․ սա է փոքր ազգերի եւ փոքր պետութիւնների մեծագոյն մարտահրաւէրը, Հայաստանի եւ հայ ժողովրդի գլխին դաժանօրէն կախւած ինքութենական եւ գոյաբանական ճգնաժամի առանցքային հարցը։
Մենք, ցաւօք, սա չենք ընկալում»,- գրել է նա:
