Բայրամով. «Խաղաղութեան պայմանագիրը պէտք է վերացնի տարածքային խնդրին վերադառնալու բոլոր ռիսկերը»
«ԱԼԻՔ» – Ադրբեջանի ԱԳ նախարար Ջէյհուն Բայրամովը ռուսական «Իզւեստիա»-ին տւած հարցազրոյցում յայտարարել է, թէ Բաքուն բաց է Հայաստանի հետ բանակցային գործընթացի համար:
«Այդ նպատակով մենք օգտագործում ենք ուղիղ երկկողմ ձեւաչափ Ադրբեջանի եւ Հայաստանի միջեւ։ Միաժամանակ երբեք չենք հրաժարւել տարբեր հարթակներից: Ռուսաստանի Դաշնութեան հարթակը մեզ համար միշտ ընդունելի է եղել»,- նշել է նա։
Միժամանակ, ադրբեջանցի նախարարը Երեւանի նկատմամբ հետագայ պահանջներ է հնչեցրել։
«Ադրբեջանական կողմի դիրքորոշումն այն է, որ մենք նպատակաուղղւած ենք Հայաստանի Հանրապետութեան հետ յարաբերութիւնների կարգաւորմանը, բայց մենք լիովին հաւատարիմ ենք այն գծին, որ բոլոր այն անհիմն պահանջները, բոլոր այն անհիմն դիրքորոշումները, որոնք Հայաստանի Հանրապետութիւնը յայտարարել է տասնամեակներ շարունակ, պէտք է ամբողջութեամբ վերացւեն: Եւ դա չպէտք է տեղի ունենայ յայտարարութիւնների եւ հռչակագրերի մակարդակով, այլ դա պէտք է արտացոլւի իրաւական հիմնաւորւած ձեւով: Հայաստանի եւ Ադրբեջանի միջեւ կնքւած խաղաղութեան պայմանագիրը պէտք է վերացնի ապագայում երկրների միջեւ տարածքային խնդրին վերադառնալու բոլոր հնարաւոր ռիսկերը»,- յաւելել է Բայրամովը։
