Նարիշկին. «Ռուսաստանը ցանկանում է կանխել Վրաստանում «գունաւոր յեղափոխութիւն» իրականացնելու փորձերը»

«ԱԼԻՔ» – Ռուսաստանը, հրապարակելով իր ունեցած  հետախուզական տեղեկութիւնները, ցանկանում է կանխել Վրաստանում գունաւոր յեղափոխութեան փորձերը: Այս մասին ըստ Yereva.today-ի՝ ՏԱՍՍ-ին ասել է Ռուսաստանի արտաքին հետախուզութեան ծառայութեան տնօրէն Սերգէյ Նարիշկինը՝ մեկնաբանելով աւելի վաղ ծառայութեան կողմից արւած նախազգուշացումը։

«Այն, որ Ռուսաստանի արտաքին հետախուզութեան ծառայութիւնը տեղեկութիւն է հրապարակել ոչ միայն արեւմտեան հետախուզական ծառայութիւնների, այլեւ պետական կառոյցների, օրինակ ԱՄՆ պետքարտուղարութեան թշնամական գործունէութեան մասին, նրա համար է, որպէսզի նպաստենք Վրաստանում «գունաւոր յեղափոխութեան» կանխմանը»,-ասել է Նարիշկինը։

Յիշեցնենք, որ աւելի վաղ Ռուսաստանի արտաքին հետախուզական ծառայութիւնը հաղորդագրութիւն էր տարածել, որում նշւած էր, որ ամերիկեան իշխանութիւնները պատրաստւում են «թբիլիսեան մայդան» իրականացնել, որպէսզի թոյլ չտան, որ «Վրացական երազանք» կուսակցութիւնը յաղթի հոկտեմբերին կայանալիք խորհրդարանական ընտրութիւններում։ Ըստ սցենարի՝ «թբիլիսեան մայդանում» պէտք է հրապարակւեն «ընտրակեղծիքների ապացոյցներ», յայտարարւի ընտրութիւնների արդիւնքները չճանաչելու մասին եւ իշխանափոխութեան պահանջ հնչեցւի։

Ռուսաստանի արտաքին հետախուզական ծառայութեան համաձայն՝ իրաւապահ մարմիններին կը հրահրեն բռնի ուժով ճնշել բողոքի ցոյցերը։ Ամերիկացիները, ըստ ռուսական կողմի ունեցած տեղեկատւութեան, նախապէս մշակում են նաեւ Վրաստանի իշխանութիւնների կողմից «խաղաղ ցուցարարների» նկատմամբ «անհամաչափ ու բիրտ ուժի կիրառմանը» խստօրէն արձագանգելու տարբերակներ։