Արթուր Մոսիեան. «Արցախի հանդէպ մեր քաղաքական իրաւունքը ոչ ոք չի կարող տնօրինել, նոյնիսկ՝ ՀՀ ներկայ իշխանութիւնը»
«ԱԼԻՔ» – «Արցախի պաշտօնեաներն իրենց իրաւունքը չեն զիջի, այդ թւում՝ Ալէն Սիմոնեանին, քանի դեռ կայ բռնազաւթւած Արցախ, Ադրբեջանում պահւող գերիներ, արցախահայութեան չլուծւած իրաւունքներ։ Որքան էլ սոցիալական առումով Արցախի պաշտօնեաների գործունէութեան իրաւունքները սահմանափակւեն, Արցախի հանդէպ մեր քաղաքական իրաւունքը ոչ ոք չի կարող տնօրինել, նոյնիսկ՝ ՀՀ ներկայ իշխանութիւնը։ Արցախի ժողովրդի մանդատը ստանձնած քաղաքական ղեկավարութիւնը շարունակելու է իր պայքարը արցախցիների վերադարձի իրաւունքի իրացման ուղղութեամբ։ Ո՞վ պէտք է պայքարի Արցախի ժողովրդի իրաւունքների համար, եթէ ոչ՝ Արցախի ժողովրդի կողմից ընտրւած օրինական մարմինները»։
«Ապառաժ»-ի հետ զրոյցում, ՀՀ ԱԺ նախագահ Ալէն Սիմոնեանի սեպտեմբերի 9-ի ՀՀ ԱԺ յայտարարութիւններին անդրադառնալով, նշել է Արցախի Ազգային ժողովի պատգամաւոր, «Դաշնակցութիւն» խմբակցութեան ղեկավար Արթուր Մոսիեանը։
«Տպաւորութիւն է՝ ՀՀ իշխանութիւններն Ադրբեջանից աւելի շատ են շահագրգռւած Արցախի էջը փակելու համար։ Նողկալի է դիտել՝ Ալիեւին բարեխօսելու համար ինչպէս են քամահրանքով խօսում Արցախի իշխանութիւնների, պետական ինստիտուտների մասին երկրի թիւ մէկ ամբիոնից, երբ Հայաստանը պէտք է հանդիսանար Արցախի երաշխաւորը եւ Արցախի իշխանութիւնների հետ միջազգային հարթակներում պայքարեր նրա իրաւունքների վերահաստատման համար։
Արցախը եղել եւ մնում է մեր Ազգային արժանապատւութիւնը, եւ անթոյլատրելի է, որ ինչ-որ «խմբակ» վարկաբեկի այն։
Սա առաջին անգամը չէ, որ ՀՀ իշխանութիւններն աւելի ադրբեջանամետ կեցւածք են դրսեւորում, քան ադրբեջանական իշխանութիւնները։ Տպաւորութիւն է, որ իշխող քաղաքական խմբակն ունի պարտաւորութիւններ ադրբեջանական ղեկավարութեան առաջ եւ առիթը բաց չի թողնում նրանց հաճոյանալու համար՝ կրկին անգամ արցախցիների բաց վէրքին աղ լցնելով»,- ասել է Արթուր Մոսիեանը։
