«ԱԼԻՔ» – ԱԳ նախարար Սէյէդ Աբբաս Արաղչին Ռադիօհեռուստատեսութեան լրատւական գործակալութեան հետ զրոյցում, դատապարտել է Իրանի դէմ սահմանւած Արեւմուտքի նոր պատժամիջոցները՝ այն պատրւակով, որ Թեհրանն իբր զէնք է մատակարարում Ռուսաստանին։ Նա միեւնոյն ժամանակ, յայտարարել է Արեւմուտքի հետ տարաձայնութիւնները լուծելու համար կառուցողական բանակցութիւններ վարելու պաշտօնական Թեհրանի պատրաստակամութեան մասին:
Արաղչին, սակայն ընդգծել է, որ բանակցութիւնները պէտք է հիմնւած լինեն փոխադարձ յարգանքի, այլ ոչ թէ ճնշումների եւ սպառնալիքների վրայ:
Արեւմտեան կառավարութիւններին յիշեցնելով պատժամիջոցների անիմաստութիւնը՝ Իրանի արտաքին քաղաքական գերատեսչութեան ղեկավարն ասել է, որ նրանք չեն կարող պատժամիջոցների միջոցով իրենց կամքը պարտադրել Իրանին:
«Իրանը մշտապէս հանդէս է եկել երկխօսութեան օգտին եւ երբեք չի հրաժարւել կառուցողական բանակցութիւններից՝ փոխըմբռնման հասնելու եւ տարաձայնութիւնները լուծելու համար: Իրանը պատրաստ է բանակցութիւնների՝ հիմնւած փոխադարձ յարգանքի, այլ ոչ թէ սպառնալիքների եւ ճնշման վրայ»,- յայտարարել է նա:
Արաղչին քննադատել է պատժամիջոցները որպէս անյաջող գործիք առճակատման եւ ճնշում գործադրելու համար, քան համագործակցութեան:
«Իսկապէս զարմանալի է, որ արեւմտեան կառավարութիւնները դեռեւս դիմում են պատժամիջոցների վատ փորձին»,- նշել է նա՝ խորհուրդ տալով Արեւմուտքին փոխել իր քաղաքական կուրսն ու գործելաոճը։
