Ադրբեջանի համար խաղաղութիւնը Հայաստանի կապիտուլիացիան է

Եթէ Ադրբեջանը երէկ ստորագրել է յայտարարութիւն, որով ճանաչել է տարածքային ամբողջականութեան սկզբունքը, այսօր պէտք է իր օկուպացիոն զօրքերը արդէն դուրս բերէր Գեղարքունիքի, Սիւնիքի եւ Վայոց Ձորի մարզերից: Այս մասին  հոկտեմբերի 24-ին, ԱԺ-ում լրագրողների հետ զրոյցում նշեց ՀՅԴ անդամ, ԱԺ «Հայաստան» խմբակցութեան պատգամաւոր Արթուր Խաչատրեանը:

«Բայց Ադրբեջանը մի կողմից ընդունելով նման յայտարարութիւն, միւս կողմից պահելով իր օկուպացիոն զօրքերը Հայաստանի տարածքում, յստակ ուղերձ է յղում, որ ինքը որեւէ դէպքում խաղաղութեան գնալու ցանկութիւն չունի, եթէ այդ «խաղաղութեան» համաձայնագիրը չլինի Հայաստանի կապիտուլիացիայի յայտարարութիւն:

Պատերա՞զմ, թէ՞ խաղաղութիւն՝ դա ադրբեջանական նարատիւ է, մեզ մօտ կայ ցեղասպանւե՞լ, թէ՞ ինքնապաշտպանւել, որովհետեւ Ադրբեջանն իր բոլոր գործողութիւններով ցոյց է տալիս, որ խաղաղութիւնը իր համար ընդունելի չէ, բացի Հայաստանի կապիտուլիացիայից: Եթէ մենք դրան համաձայն չենք, պէտք է բոլոր միջոցները ձեռնարկենք, որ ապահովենք մեր տարածքային ամբողջականութիւնը, Արցախի ժողովրդի քաղաքական իրաւունքները, ներառեալ ինքնորոշման իրաւունքը: Բայց Հայաստանի իշխանութիւնները մեզ որեւէ լաւ տեղ չեն տանում», – յայտարարեց ընդդիմադիր պատգամաւորը:

Ըստ նրա՝ ամենալուրջ վտանգն այն է, որ Հայաստանը չդառնայ Արեւմուտքի, Հիւսիսի ու Հարաւի բախման թատերաբեմ:

«Ցաւօք սրտի, այս իշխանութիւնների արտաքին քաղաքականութիւնը բերել է նրան, որ Հայաստանը վերածւել է բախումների թատերաբեմի: Թէ որտեղ են ընթանում բանակցութիւնները, դա երկրորդական հարց է, առաջին հարցն այն է, թէ բանակցութիւնների սեղանին ինչ է դրւած, եւ այն մարդը, որ Հայաստանն է ներկայացնում, արդեօք պաշտպանում է հայկական շահերը: Ցայժմ մենք որեւէ հիմք չունենք պնդելու, որ Հայաստանի բանակցողները պաշտպանում են Հայաստանի շահերը», – ընդգծեց Արթուր Խաչատրեանը։

Երեք տարի ինչ ասել ենք՝ ճիշտ ենք ասել, Փաշինեանն ինչ ասել է, սխալ է ասել, որովհետեւ 3-5 տարի մենք անընդհատ գլորւում ենք դէպի անդունդը նշեց Արթուր Խաչատրեանը՝ անդրադառնալով դիտարկմանը, որ ընդդիմութիւնը ձախողւել է իշխանափոխութեան հարցում:

«Այո, պէտք է փոխել իշխանութիւնը, բայց հիմա ընդդիմութեանը խփելն արդեօք օգնո՞ւմ է իշխանութեան փոխելուն: Չի օգնում: Վերջապէս, հասարակութեան մէջ, քաղաքական ներկապնակի վրայ կայ-չկայ, բայց միակ լուրջ, կազմակերպւած, ինստիտուցիոնալ ընդդիմութիւնը մենք ենք, ԱԺ-ում հաւաքւածներն է եւ անում ենք այն, ինչ որ ընդդիմութիւնը պէտք է անի, քննադատում ենք իշխանութեանը»,-յայտարարեց ընդդիմադիր պատգամաւորը:

Նա յայտնեց, որ իրենք փորձում են մարդ մոբիլիզացնել փողոցում. «Այնքան չենք անում, որքան պէտք է, բայց նայենք, թէ այլընտրանքային ընդդիմութիւնը քանի մարդ է կարողանում մոբիլիզացնել: Նաեւ նայենք, թէ փողոցում այս իշխանութիւններն ինչ աջակցութիւն ունեն: Երեւանի քաղաքապետի ընտրութիւնները դրա ամենավառ վկայութիւնն են»,-ասաց Արթուր Խաչատրեանը՝ յաւելելով, որ ինչքան շատ մարդ մոբիլիզացւի, այնքան շուտ կը կարողանան այս իշխանութիւններից ազատւել, փոխել պետութեան քաղաքականութեան կուրսը:

Արթուր Խաչատրեանը անդրադառնալով դժգոհութեանը, որ ընդդիմութիւնը վճռական գործողութիւնների չի գնում եւ չի կարողանում իշխանափոխութիւն իրականացնել, ասաց՝ գործողութիւն պահանջող եւ գործողութեան մասնակցող մարդիկ էապէս իրարից տարբերւում են, որովհետեւ պահանջել գործողութիւն, ենթադրենք, կիրակի երեկոյեան, բայց չգալ գործողութեան երկուշաբթի առաւօտեան, դա նշանակում է՝ դու պահանջում ես «թամաշա»:

«Արդեօք այն քաղաքացին, որ պահանջում է գործողութիւն, բայց այդ գործողութեանը չի մասնակցում, ինքն իր հետ անկեղծ է»,-ասաց նա:

Անդրադառնալով հայ-ռուսական յարաբերութիւններին, Արթուր Խաչատրեանն ասաց. «Ինչքան էլ Փաշինեանը յայտարարի, որ հայ-ռուսական յարաբերութիւնները լաւ են… Եթէ հայ-ռուսական յարաբերութիւններն լաւ են՝ ինչո՞ւ են եթերում սփռւում հաղորդումներ, որոնք վնասում են հայ-ռուսական յարաբերութիւններին»:

Բանակցութիւնների այլընտրանքը պատերազմն է. ցաւօք, 2020-ի 44-օրեայ պատերազմին նախորդել էին բանակցութիւնների ձախողումները ասաց Արթուր Խաչատրեանը՝ անդրադառնալով նախօրէին Իրանում «3+3» ձեւաչափով հանդիպմանը:

«Այս իշխանութիւնները ձախողել էին ամբողջ բանակցային գործընթացը, կորցրել էին բոլոր դաշնակիցներին, նոր դաշնակիցներ ձեռք չէին բերել: Որեւէ բանակցութեան չգնալուց առաջ պէտք է հասկանալ, թէ դրա այլընտրանքը որն է: Այնպէս որ բանակցութիւնների գնալը ճիշտ բան է, բայց կարեւորը այն չէ, թէ բանակցութիւնների սեղանը որտեղ է դրւած, կարեւորն այն է, թէ բանակցութիւնների սեղանին ինչ է դրւած»,-ասաց պատգամաւորը:

Նա նկատեց, որ գործող իշխանութիւնը բոյկոտում է  ՀԱՊԿ-ի եւ ԱՊՀ-ի հարթակները. «Իրենք խօսում են «հայկական խաչմերուկի» մասին: Ես դեռ նախորդ տարւայ փետրւարին հարցում եմ ուղարկել, թէ հաշւարկներ կա՞ն: Տեղական կառավարման ենթակառուցւածքների (ՏԿԵ) նախարարութիւնը պատասխանել է, որ դրա մասին կարող ենք խօսել, երբ տեխնիկական տեսական ուսումնասիրութիւնն աւարտւած լինի: Այսինքն առանց այդ ուսումնասիրութեան պնդումներ կատարելը անտրամաբանական է: Այն հաշւարկները, որոնք ես եմ արել, տնտեսական առումով որեւէ լաւատեսութիւն չի ներշնչում: Թուրքական էքսպանսիան մի կողմից, միւսը, եթէ կայ աւելի արդիւնաւէտ ճնապարհ, օրինակ, Իջեւան- Ղազախ ճանապարհը, որն աւելի կարճ է, դա չեն գործարկում, գնում են միայն հարաւային ճանապարհով: Ակնյայտ է, որ դա Ադրբեջանի ճնշման ներքոյ են գնում»,- յայտարարեց ընդդիմադիր պատգամաւորը:

Ֆրանսիայից զէնք ձեռք բերելը միայն դրական ազդեցութիւն կունենայ Հայաստանի անվտանգութեան վրայ,- նշեց Արթուր Խաչատրեանը:

«Հինգ տարւայ ընթացքում, վերջապէս, յաջողացրեցին Ֆրանսիայից երեք ռադիոլակացիոն կայան ձեռք բերել ու ինչ-որ հրթիռների մասին պայմանաւորւածութիւն: Դա պէտք էր շուտ անել, ոչ թէ գալ, ԱԺ ամբիոնից կամ Հանրայինի եթերից ողբալ, ասել՝ փող ունենք, բայց մեզ զէնք չեն տալիս։ Դա նոյնն է, ոնց որ ես գնամ տուն ու ասեմ՝ կնիկ, երեխէք, ես փող ունեմ, բայց մեր խանութում ինձ հաց չեն վաճառում: Տեսնում ես զէնք չի տալիս, մէկ օր չի տալիս, երկու օր չի տալիս, երրորդ օրը բողոքելու փոխարէն պէտք է փորձել այլ մատակարար գտնել: Եթէ չես կարողանում երկրի պաշտպանունակութիւնը ապահովել, մնայիր թերթի խմբագիր: Որովհետեւ մինչ այդ զէնք մատակարարւում էր թէ՛ Հարաւից, թէ՛ Հիւսիսից, թէ՛ Արեւելքից, թէ՛ Արեւմուտքից», – ասաց նա:

Արթուր Խաչատրեանը նկատեց, որ երեք ռադիոլոկացիոն կայանների դէպքում աղմուկն աւելի շատ էր, քան կարող էր լինել:

«Arfd.am»