«ԱԼԻՔ» – Սիստան եւ Բելուչիստան նահանգի Թաֆթան շրջանում, երէկ՝ հոկտեմբերի 26-ին, զինւած բախում է տեղի ունեցել ոստիկանութեան ուժերի եւ ահաբեկիչ յանցագործների միջեւ, որի արդիւնքում զոհւել են 10 ոստիկաններ եւ զինծառայողներ:
Ոստիկանական ուժերի պարեկախումբը դարանակալ յարձակման է ենթարկւել ահաբեկիչ յանցագործների կողմից: Դաժան մարտերի ընթացքում նահատակւել են 10 ոստիկաններ եւ զինծառայողներ:
Սիստան եւ Բելուչիստանի ոստիկանութիւնը հրապարկել է յայտարարութիւն՝ նշելով, որ իրականացւում է հետաքննութիւն դէպքի բոլոր մանրամասները պազրելու համար:
Դէպքի առիթով, յայտարարութեամբ է հանդէս եկել նաեւ Ներքին գործերի նախարարութիւնը, որը խորը մտահոգութիւն է յայտնել դէպքի առիթով եւ ընդգծել է մեղաւորներին անյապաղ յայտնաբերելու եւ պատասխանատւութեան ենթարկելու անհրաժեշտութիւնը:
Նշենք, որ աւելի ուշ, գործողութեան պատասխանատւութիւնը ստանձնել է «Ջէյշ օլ Ադլ» ահաբեկչական խմբաւորումը:
