Վեհափառ Հայրապետ. «Մեր երկիրը գտնւում է անկախ պետականութիւնը անսասան պահպանելու անհրաժեշտութեան առջեւ»
«ԱԼԻՔ» – Նոյեմբերի 3-ին Միածնաէջ Մայր Տաճարում յընթացս Սուրբ եւ Անմահ Պատարագի տեղի է ունեցել եպիսկոպոսական ձեռնադրութիւն եւ օծում: Այս մասին յայտնել է Մայր Աթոռի տեղեկատւական կենտրոնը:
Սրբազան արարողութեան աւարտին, յիշարժան այս օրւայ առիթով Ամենայն Հայոց կաթողիկոսն իր Հայրապետական պատգամն է ուղղել նորաօծ եպիսկոպոսներին եւ հաւատաւոր ժողովրդին։
Իր պատգամաում, Վեհափառ Հայրապետն անդրադարձել է նաեւ լրջագոյն այն մարտահրաւէրներին, որոնց դէմ-յանդիման է կանգնած այսօր հայոց պետականութիւնն ու հայ ժողովուրդը.
«Անշուշտ, պատմական փոթորկալի զարգացումները, աշխարհաքաղաքական ծանր իրողութիւնները յաճախ մեր ազգին կանգնեցրել են երբեմն անյաղթահարելի եւ անդառնալի թւացող կորուստների եւ ծանր հիմնախնդիրների առջեւ, որոնցից անմասն չի եղել նաեւ Հայոց եկեղեցին։ Այսօր եւս մեր ժողովուրդն ու երկիրը գտնւում են լրջագոյն մարտահրաւէրների յանդիման, հայրենական անդաստանում արդարութիւնն ու ճշմարտասիրութիւնը զօրացնելու, համազգային միաբանութիւնը հաստատուն պահելու եւ անկախ պետականութիւնը անսասան պահպանելու անհրաժեշտութեան առջեւ»,- նշել է Վեհափառ Հայրապետը՝ մտահոգութեամբ արձանագրելով, որ տիրող դժւարին իրադրութեանը զուգընթաց տարատեսակ վնասակար գաղափարախօսութիւնների տարածմամբ հայ հասարակութեան մէջ փորձ է արւում նսեմացնել մեր Սուրբ եկեղեցու պատմական առաքելութեան եւ քրիստոնէական արժէքների կարեւորութիւնը, ընտանիքի աւանդական ընկալումը, խարխլել ազգային համերաշխութեան հիմքերը։
Այս առնչութեամբ Նորին Սրբութիւնն ընդգծել է, որ նման տագնապալի պայմաններում հարկ է Տիրոջ օգնականութեամբ բազմապատկել հոգեւորականների եւ եկեղեցական կառոյցների ջանքերը՝ ի նպաստ վիրաւոր մեր հայրենիքի եւ ժողովրդի առջեւ ծառացած խնդիրների արժանապատիւ յաղթահարման, ազգային ոգու զօրացման եւ ինքնութեան անխաթար պահպանման։
