Արաղչի. «Իրանը շարունակում է բաց պահել դիւանագիտութեան պատուհանը. մենք պատրաստ ենք բանակցելու»

«ԱԼԻՔ» – ԱԳ նախարար Սէյէդ Աբբաս Արաղչին յայտնել է, որ պաշտօնական Թեհրանը պատրաստ է բանակցել: Այս մասին նա յայտարարել է երէկ՝ երեկոյեան, հեռուսատեսութեան «Յատուկ լրատւական հարցազրոյց» հաղորդման ժամանակ:

Հարցազրոյցի ընթաքում Արաղչին անդրադարձել է Միջուկային համաձայնագրի վերականգնմանն ուղղւած բանակցութիւնների վերականգնման հնարաւորութեանը.

«Միջուկային համաձայնագրի վերականգնմանն ուղղւած բանակցութիւնները մի քանի տարի է ինչ շարունակւում են: Այն սկսւել է դեռեւս 2021 թւականի գարնանը, երբ պրն. Բայդէնը ստանձնեց պաշտօնը եւ յայտնեց, որ ցանկանում է վերականգնել համաձայնագիրը: Նահատակ Ռէյիսի կառավարութիւնը նոյնպէս շարունակեց բանակցութիւնները եւ ինչ-որ առաջընթաց ունեցաւ, բայց յետոյ տեղի ունեցան բաներ, որոնք խանգարեցին:

Պրն. Փեզեշքիանի կառավարութեան օրօք, մենք փորձեցինք բանակցութիւնները շարունակել Նիւ Եօրքում, ինչը ողջունեցին եւրոպացիները: Ինչպէս այս բանակցութիւնները, այնպէս էլ նահատակ Ռէյիսիի կառավարութեան օրօք Մասկատում սկսւած գործընթացը, անուղղակի բանակցութիւններ են, որոնք ընթանում են Իրանի եւ ԱՄՆ-ի միջեւ: Որոշւած էր շարունակել բանակցութիւնները երկու ուղղութիւններով, որ տեղի ունեցան Լիբանանի դէպքերն ու բանակցութիւնները դադարեցւեցին»,- ասել է ԱԳՆ ղեկավարը՝ նշելով, որ եւրոպական կողմի հետ բանակցութիւնները հնարաւոր է շուտով վերսկսւեն, սակայն Մասկատի բանակցութիւնները սառեցւած են, ինչը պայմանաւորւած է ԱՄՆ նախագահական ընտրութիւններով. «Պէտք է տեսնենք, թէ ԱՄՆ նոր կառավարութիւնն ինչ մօտեցում կը ցուցաբերի, եւ մենք կը գործենք դրա հիման վրայ»:

Արաղչին նշել է, որ հնարաւոր բանակցութիւնների դրական ելքի արդիւնքում անգամ, անհրաժեշտ է նոր համաձայնութեան կայացում, քանի որ վերջին տարիների իրադարձութիւնների հետեւանքով Միջուկային համաձայնագիրը կորցրել է իր արդիականութիւնը եւ արժէքը.

«Միջուկային համաձայնագիրն իր ներկայ տեսքով չի կարող վերականգնւել, այն ընդամէնը կարող է հիմք հանդիսանալ նոր համաձայնութեան կայացման համար:

Եթէ անգամ բանակցութիւնները վերսկսւեն, ժամանակը շատ կարճ է լինելու, քանի որ 2025 թւականի հոկտեմբերին աւարտւելու է ՄԱԿ-ի Անվտանգութեան խորհրդի ընդունած 2231 բանաձեւի ժամկէտը: Երբ բանաձեւի գործողութեան ժամկէտն աւարտւի, դրա վերականգնման հնարաւորութիւն այլեւս գոյութիւն չի ունենայ»,- ասել է Արաղչին՝ յաւելելով, որ նման բարդ բանակցութիւնների համար ժամանակը խիստ սահմանափակ է. «Մանաւանդ, որ տարածաշրջանում ճգնաժամ է, Ուկրաինայում ճգնաժամ է, Ամերիկայում նոր կառավարութիւն է եկել աշխատելու, եւ այս բոլորը բարդացնում են գործը»:

Նա այնուամենայնիւ նշել է, որ Իրանը պատրաստ է բանակցելու եւ բաց է թողնելու դիւանագիտութեան պատուհանը. «Մենք լիովին պատրաստ ենք բանակցութիւններին, կարծում եմ, որ դա հնարաւոր է, եւ կողմերը կարող են աշխատել այդ ուղղութեամբ։ Մենք դիւանագիտութեան պատուհանը շարունակում ենք բաց պահել, եթէ միւս կողմում առկայ լինի բանակցելու իրական կամք, բնական է, որ այլ ուղղութեամբ կընթանանք»:

Արաղչին միեւնոյն ժամանակ յիշեցրել է, որ Իրանը պատրաստ է ցանկացած զարգացման եւ հնարաւոր սցենարի համար.

«Մենք ունենք անհրաժեշտ նախապատրաստութիւն հնարաւոր ցանկացած զարգացման համար: Ինչպէս Սիոնիստական ​​ռեժիմի հարցում էինք յայտարարել, որ Իրանը պատրաստ է ցանկացած սցենարի, այստեղ եւս ես արեւմտեան կողմին ասում եմ, որ մենք պատրաստ ենք ցանկացած զարգացման եւ տարբեր սցենարների: Եթէ հասնենք առճակատման կէտի, մենք պատրաստ ենք դրան, եթէ հասնենք փոխգործակցութեան կէտին, նոյնպէս պատրաստ ենք»,- յստակեցրել է ԱԳ նխարարը: