Արցախի Աժ. «Կոչ ենք անում միանալ Շւէյցարիայի՝ Արցախի ժողովրդի իրաւունքների պաշտպանութեան հարցը հասցէագրելու համար միջազգային յարթակ ստեղծելու ջանքերին»
«ԱԼԻՔ» – Արցախի Հանրապետութեան ԱԺ նախագահի պարտականութիւնները կատարող Գագիկ Բաղունցը շնորհակալութիւն է յայտնում Շւէյցարիայի Ազգային խորհրդին:
Շնորհակալական ուղերձում մասնաւորապէս նշւած է.
«Արցախի Հանրապետութեան Ազգային ժողովի անունից երախտագիտութիւն եմ յայտնում Շւէյցարիայի Ազգային խորհրդին, բանաձեւի հեղինակ պատգամաւոր Էրիխ Ֆոնտոբելին եւ խորհրդարանի բոլոր քաղաքական ուժերին՝ Արցախի ժողովրդի իրաւունքներին ցուցաբերած աջակցութեան համար։
Խորհրդարանի Ստորին պալատի ընդունած բանաձեւը, որով գործադիրին կոչ է արւում Լեռնային Ղարաբաղի հարցով միջազգային խաղաղութեան ֆորում անցկացնել, նշանակալից քայլ է Արցախի բռնի տեղահանւած ժողովրդի իրաւունքների, մասնաւորապէս՝ անվտանգ ու արժանապատիւ վերադարձն ապահովելու ուղղութեամբ։
Մենք բարձր ենք գնահատում Շւէյցարիայի հաւատարմութիւնը միջազգային իրաւունքին ու արդարութեանը եւ յոյս յայտնում, որ այս գործընթացն ունենալու է իր տրամաբանական շարունակութիւնը: Շւէյցարիայի Ազգային խորհուրդը, պաշտպանելով Արդարադատութեան միջազգային դատարանի վճռի իրագործումը, ցոյց է տւել, որ յստակ գիտակցում է այս հարցի հրատապութիւնը։
Կոչ ենք անում միջազգային հանրութեան մնացած անդամներին միանալ Շւէյցարիայի՝ Արցախի ժողովրդի իրաւունքների պաշտպանութեան հարցը հասցէագրելու համար միջազգային յարթակ ստեղծելու ջանքերին։ Մենք հաւատում ենք, որ համադրւած միջազգային ջանքերի շնորհիւ կարող ենք հասնել արդար եւ կայուն խաղաղութեան տարածաշրջանում»:
