Լեւոն Զուրաբեան. «Հանրութեանը չյաջողւեց համոզել, որ ԼՂ վախճանի մեղաւորը նախկին նախագահներն են, իսկ ընտրութիւնները մօտենում են»

«ԱԼԻՔ» – Նիկոլ Փաշինեանը, պետական գործերը թողած, յուսահատ ջանքեր է գործադրում՝ երկու օրւայ մէջ արդէն երեք ստատուսով եւ մէկ տեսաուղերձով աղերսելով Հայաստանի երեք նախագահներին, որ նրանք գան, իր հետ բանավիճեն իր ամբողջ «քաղաքական» գործունէութեան մէջ երբեւէ ասւած ամենայիմար պնդման շուրջ։ Այս մասին իր էջում գրել է ՀԱԿ փոխնախագահ Լեւոն Զուրաբեանը:

Նա, մասնաւորապէս, նշել է. «Այս մանիակալ համառութիւնը միայն մէկ բան է նշանակում։ Արցախեան աղէտի համար անձնական մեղաւորութիւնն իր վրայից մաքրելու հսկայական ջանքերը անցած տարիների ընթացքում ոչ մի արդիւնք չտւեցին։ Հանրութեանը չյաջողւեց համոզել, որ Արցախի վախճանի մեղաւորներն են նախկին նախագահները, կոռումպացւած գեներալները, Հայաստանին դաւաճանած Ռուսաստանը, կռւել չցանկացող ժողովուրդը եւ իր մոգոնած բազմաթիւ այլ շանթարգելներ։ Իսկ ընտրութիւնները մօտենում են, եւ կլիենտը սկսել է «նեարդայնանալ»։

Ինքն էլ գիտի, թէ ի՜նչ վնաս կը տար Հայաստանին նման բանավէճը, եթէ, Աստւած մի՜ արասցէ, կայանար, ի՜նչ բերկրանք այն կը պատճառէր Հայաստանի թշնամիներին, ինչքա՜ն կը սասանէր մեր երկրի առանց այդ էլ խաթարւած վարկը, ինքն էլ գիտի, որ պետական մտածողութեան փոքր նշոյլ անգամ ունեցող որեւէ ղեկավար երբեւէ չի համաձայնի նման վնաս պատճառել սեփական հայրենիքին։

Բայց ինքը պատրաստ է երեխայի համար վէճի մէջ թրով կիսել այդ երեխային, ինչպէս պատրաստ էր զոհաբերել Արցախը՝ իբր թէ Հայաստանի պահպանման համար, իսկ հիմա պատրաստ է զոհաբերել արդէն Հայաստանի ցանկացած տարածք, անկախութիւնը եւ արժանապատւութիւնը՝ իր կարծիքով տարածաշրջանի նոր տէրերի ձեռքով իր իսկ իշխանութիւնը պահելու նպատակով։

Սա ընդամէնը հանրութեան վստահութիւնը կորցնող ինքնասիրահարւած կուռքի հիստերիկա է, որը փորձում է կախւել փրփուրից։ Բայց նորից եմ ասում՝ պատմութեան դատաստանի առջեւ որեւէ PR-ակցիա անզօր է»։