FT. ««Օրեշնիկ»-ն արտադրւում է արեւմտեան սարքաւորումների օգտագործմամբ»
«ԱԼԻՔ» – «Օրեշնիկ» հրթիռը, որը, ըստ ՌԴ նախագահ Վլադիմիր Պուտինի, այնքան տեխնոլոգիապէս զարգացած է, որ, իբր, այն անհնար է որսալ ժամանակակից հակաօդային պաշտպանութեան համակարգերով, արտադրւում է ռուսական ձեռնարկութիւններում՝ օգտագործելով արեւմտեան առաջադէմ տեխնիկա: Այս մասին յայտնում է Financial Times (FT) թերթը։
Այս եզրակացութիւնը հիմնւած է հրթիռային տեխնոլոգիաներ, այդ թւում՝ բալիստիկ հրթիռներ արտադրող ռուսական խոշոր ձեռնարկութիւնների գործունէութեան մասին տեղեկատւութեան վրայ։ Խօսքը Մոսկւայի ջերմային ճարտարագիտութեան ինստիտուտի, Sozvezdie կոնցեռնի եւ Titan-Barricades գիտահետազօտական եւ արտադրական կենտրոնի մասին է։ Ուկրաինական հետախուզութիւնն աւելի վաղ նշել էր, որ այդ ձեռնարկութիւնները մասնակցում են «Օրեշնիկի» ստեղծմանը։ Հաղորդում է news.am-ը:
Առաջին երկու կազմակերպութիւնները փնտրում էին գերմանական եւ ճապոնական ընկերութիւնների կողմից արտադրւած մետաղամշակման համակարգերի հետ աշխատելու հմտութիւններ ունեցող աշխատակիցների։
2024 թւականին MIT-ը, որն արտադրում է մարտավարական եւ ռազմավարական միջմայրցամաքային բալիստիկ հրթիռներ, գովազդ է հրապարակել գերմանական Siemens եւ Haidenhein եւ ճապոնական Fanuc CNC համակարգերին տիրապետող մասնագէտների հաւաքագրման համար։
Նոյն երեք ընկերութիւնների մեքենաներն օգտագործւում են նաեւ Վորոնէժի «Սոզւեզդիէ» պաշտպանական ձեռնարկութիւնում։ Կոնցեռնի թափուր աշխատատեղերում նշւած էր, որ պոտենցիալ աշխատակիցները պէտք է հասկանան նշւած ընկերութիւնների բարձր ճշգրտութեան համակարգերը։
Բացի այդ, FT-ն ուշադրութիւն է հրաւիրել հրետանու եւ հրթիռային ոլորտում մասնագիտացած վոլգոգրադեան Titan Barricades ընկերութեան տեսանիւթի վրայ, որում աշխատողներից մէկը կանգնած է Fanuc լոգոտիպով սարքի առջեւ։ Բացի այդ, Stan ընկերութիւնը, որը ջանքեր է գործադրում CNC մեքենաների սեփական ռուսական արտադրութիւնը ստեղծելու համար, իր գովազդում յայտնում է իր աշխատանքում Heidenhain սարքաւորումների օգտագործման մասին։
Չնայած Ուկրաինայի եւ նրա դաշնակիցների ջանքերին՝ սահմանափակելու ռազմական արտադրութեան համար օգտագործւող տեխնոլոգիաների եւ սարքաւորումների ներմուծումը Ռուսաստան, 2024 թւականի սկզբից նման մատակարարումների ծաւալը հասել է առնւազն 3 միլիոն դոլարի (ներառեալ Հայդենհէյնի սարքաւորումները): Թէեւ ընդհանուր առմամբ նման ապրանքների մատակարարումը Ռուսաստանի Դաշնութիւն դանդաղել է, FT-ն հաշւարկել է:
Վերջին խմբաքանակներից մէկը ներառում էր 2023 թւականին արտադրւած նոր Heidenhain TNC640 կառավարման բլոկ պարունակող համակարգ՝ 345 հազար դոլար արժողութեամբ: Այս բաղադրիչը «հնարաւորութիւն է տալիս համակցւած ֆրեզման, պտտման եւ մանրացման աշխատանքները»: Սարքը Չինաստանի միջոցով առաքւել է ռուսական Baltic Industrial Company ընկերութեանը, որը գտնւում է ԱՄՆ պատժամիջոցների տակ եւ նախկինում պաշտպանական արդիւնաբերութեանը CNC սարքաւորումներ էր մատակարարում:
