Թեհրանի եւ Պեկինի միասնական մօտեցումը. Մերձաւոր Արեւելքը մեծ ուժերի խաղահրապարակը չէ

«ԱԼԻՔ» – Իրանի եւ Չինաստանի արտաքին գործերի նախարարները համատեղ փոխըմբռնման արդիւնքում նշել են, որ Մերձաւոր Արեւելքի տարածաշրջանը պատկանում է Մերձաւոր Արեւելքի ժողովրդին եւ ընդգծել, որ այս տարածաշրջանը մեծ ուժերի խաղահրապարակը չէ: 

ԻՌՆԱ-ի համաձայն, Իրանի Իսլամական Հանրապետութեան արտաքին գործերի նախարար Սէյէդ Աբբաս Արաղչիի Պեկին կատարած այցը տեղի է ունեցել Զինաստանի արտաքին քաղաքականութեան գերատեսչութեան ներկայացուցիչ՝ նախարար Վանգ Ե-ի հրաւէրով:

Աղբիւրի համաձայն նախարարները քննարկել են երկկողմ յարաբերութիւնների վերջին վիճակը եւ տարածաշրջանային զարգացումները:

Կողմերը դրական են գնահատել վերջին տարիներին Իրանի եւ Չինաստանի միջեւ համապարփակ ռազմավարական գործընկերութեան դրոյթների իրականացման գործում ձեռք բերւած առաջընթացը եւ ընդգծել, որ երկու երկրների ղեկավարների ռազմավարական ուղեցոյցների ստւերում աշխատելու են իրականացնել Երկու երկրների համապարփակ համագործակցութեան ծրագիրը եւ կառավարման փորձի փոխանակումը: Դիւանագիտական ​​ոլորտներում կը ամրապնդւեն խորհրդարանական, պաշտպանական եւ անվտանգային, ոստիկանական, դատական, տնտեսական եւ առեւտրային կապերը:

Կողմերն ընդգծել են երիտասարդութեան, կրթութեան, սպորտի, գիտութեան ու տեխնոլոգիայի, մշակոյթի, զբօսաշրջութեան, շրջակայ միջավայրի, առողջապահութեան, ռադիօ-հեռուստատեսութեան ոլորտներում փոխգործակցութեան ամրապնդումը, ինչպէս նաեւ քոյր շրջանների ու ժողովուրդների միջեւ առեւտրատնտեսութիւնը:  

Մերձարեւելեան տարածաշրջանում առկայ զարգացումների շուրջ կողմերն ընդգծել են հետեւեալ կէտերը.

1- Մերձաւոր Արեւելքի տարածաշրջանը պատկանում է Մերձաւոր Արեւելքի ժողովրդին, եւ հակամարտութիւնների այդ դաշտը մեծ ուժերի դերակատարութեան համար չէ, եւ այն չպէտք է զոհ գնայ աշխարհաքաղաքական խաղերի,կամ  տարածաշրջանից դուրս գտնւող երկրների հաւակնութիւններին։ Մերձաւոր Արեւելքի երկրների ապագան պէտք է որոշեն հենց իրենք՝ Մերձաւոր Արեւելքի ժողովուրդը։

2- Միջազգային հանրութիւնը պէտք է յարգի Մերձաւոր Արեւելքի երկրների ինքնիշխանութիւնը, անվտանգութիւնը, կայունութիւնը, միասնութիւնը եւ տարածքային ամբողջականութիւնը: Պէտք է  ուշադրութիւն դարձնել Մերձաւոր Արեւելքի երկրների ողջամիտ պահանջներին:  Յարգել Մերձաւոր Արեւելքի ժողովուրդների անկախ որոշումները: Յարգել նաեւ Մերձաւոր Արեւելքի երկրների պատմութիւնը, մշակոյթը, սովորոյթները եւ կառուցողական դեր խաղալ Մերձաւոր Արեւելքի խաղաղութեան ու կայունութեան ամրապնդման գործում:

3- Մերձաւոր Արեւելքում կայունութեան եւ խաղաղութեան հաստատման ճանապարհը միջազգային իրաւունքի վրայ հիմնւած եւ առանց արտաքին միջամտութեամբ քաղաքական լուծման սկզբունքին հաւատարիմ մնալն է։

4- Ողջունելի է համարւել Իրանի Իսլ. Հանրապետութեան եւ Սաուդեան Արաբիայի Թագաւորութեան միջեւ յարաբերութիւնների զարգացման գործընթացի շարունակումը եւ տարածաշրջանի երկրների միջեւ խորհրդակցութիւնների ու երկխօսութեան շարունակումը։

5- Պաղեստինի հարցի լուծման համար պահանջւում է յարգել եւ վերականգնել Պաղեստինի ժողովրդի օրինական իրաւունքները եւ դադարեցնել օկուպացիան: Ներկայ պահին առաջնահերթութիւնը հրադադարի անյապաղ հաստատումն է, Գազայից ռազմական ուժերի ամբողջական դուրսբերումն ու մարդասիրական օգնութիւնները:  Լիբանանում զինադադարի համաձայնագիրը պէտք է լրջօրէն ու արդիւնաւէտ կերպով իրագործւի: Իսկ Սիրիայում պէտք է համակողմանիօրէն շարունակւի ահաբեկչութեան ու ծայրայեղականութեան դէմ պայքարի, ներքին հաշտեցման ու հումանիտար օգնութիւն ուղարկելու գործընթացը։