Ադրբեջանը Ռուսաստանից փոխհատուցում է պահանջում ինքնաթիռի կործանման համար

«ԱԼԻՔ» – Ադրբեջանի իշխանութիւնները ռուսաստանեան կողմին են փոխանցել Ղազախստանի Ակտաու քաղաքի մերձակայքում «Ադրբեջանական աւիաուղիների» (AZAL) ինքնաթիռի կործանման մեղքն ընդունելու, միջադէպի մեղաւորներին պատժելու եւ փոխհատուցում վճարելու պահանջները, ադրբեջանական պետական ​​AzTV հեռուստաալիքին տւած հարցազրոյցում յայտարարել է Ադրբեջանի նախագահ Իլհամ Ալիեւը, հաղորդում է ՏԱՍՍ-ը։

«Մեր պահանջները յստակ փոխանցել ենք ռուսաստանեան կողմին, դրանք փոխանցւել են դեռ դեկտեմբերի 27-ին։ Որո՞նք են դրանք։ Նախ՝ ռուսաստանեան կողմը պէտք է ներողութիւն խնդրի Ադրբեջանից։ Երկրորդ՝ ընդունի իր մեղքը։ Երրորդ՝ պատժի մեղաւորներին, քրէական պատասխանատւութեան ենթարկի նրանց եւ փոխհատուցում վճարի ինչպէս պետութեանը, այնպէս էլ տուժած ուղեւորներին ու անձնակազմի անդամներին։ Սրանք են մեր պայմանները: Դրանցից առաջինը երէկ արդէն կատարւել է։ Յուսով եմ, որ մնացած պահանջները նոյնպէս կը բաւարարւեն»,- ասել է Ալիեւը։

Yerevan.today