«Մեր ձեւով» շարժման խօսնակ. «Երբեմնի վարկանիշը կորցրած ու օր օրի կորցնող իշխանութիւնը ցանկացած միջոցի կարող է դիմել. «Մեր ձեւով»-ը կանգ չի առնելու»

«ԱԼԻՔ» – «Տարաբնոյթ «օպերացիաներ» ծրագրելու փոխարէն, իշխանութիւնները թո՛ղ անվճար բենզինի պաշարներն աւելացնեն, որովհետեւ «Մեր ձեւով» շարժումը կանգ չի՛ առնելու»։ News.am-ի հետ զրոյցում շարժման մամուլի խօսնակ Մարիաննա Ղահրամանեանն այսպէս է արձագանքել «Հրապարակ» օրաթերթի տեղեկութիւններին, որ հոկտեմբերի 18-ի հանրահաւաք–երթից յետոյ իշխանութիւնները պատրաստւում են դաշտ նետել տարաբնոյթ կեղծ տեղեկութիւններ ու սարքած նիւթեր` այդ թւում ձայնագրութիւններ, որոնցով կը փորձեն տպաւորութիւն գործել, թէ մարդկանց փողով են հանրահաւաքի բերել։

«Ինձ չի զարմացնում ձեր հարցը։ Դա Իշխանութիւնների ձեռագիրն է։ Իհարկէ, երեսուն հազարանոց մեծ հանրահաւաքից յետոյ երբեմնի վարկանիշը կորցրած ու օր օրի կորցնող իշխանութիւնը ցանկացած միջոցի կարող է դիմել։

Նման էժանագին հնարքներով նրանք պարզապէս վիրաւորում են հրապարակ եկած մեր տասնեակ հազարաւոր ազնիւ քաղաքացիների արժանապատւութիւնը։ Իշխանութիւնների անհանգստութիւնը հասկանալի է` երկրում այդքան սպասւած փոփոխութիւնների յոյսը հասարակութիւնը կապում է «Մեր ձեւով» ժողովրդական շարժման հետ եւ մենք արդարացնելու ենք այդ յոյսերը։

Այնպէս, որ տարաբնոյթ «օպերացիաներ» ծրագրելու փոխարէն, իշխանութիւնները թո՛ղ անվճար բենզինի պաշարներն աւելացնեն, որովհետեւ «Մեր ձեւով» շարժումը կանգ չի՛ առնելու»,– ասել է նա։