2024 թւականին երկրի ներկայիս քաղաքական ղեկավարութիւնն իր գործողութիւններով, քայլերով շարունակեց բանակի հեղինակազրկումը

«ԱԼԻՔ» – 168.am-ը ՀՅԴ Հայաստանի ԳՄ անդամ, ԱԺ «Հայաստան» խմբակցութեան պատգամաւոր Գեղամ Մանուկեանից խնդրել է ամփոփել անցնող անվտանգային տարին, ըստ այդմ՝ ձեւակերպել ամանորեայ մաղթանքը: Արձանագրումները դարձեալ ցաւալի էին:

«Ցաւալիօրէն դժւար է առանձնացնել ինչ-որ յատուկ դրական փաստ կամ իրադարձութիւն, որը մեր անվտանգային համակարգի, պաշտպանունակութեան առումով իր դրոշմն է թողնելու հետագայ տարիների համար։

Ընթացիկ բանակաշինութեան գործընթացը միշտ էլ կատարւել է ու կատարւելու է։

2024 թւականը կառանձնացնէի մեր պաշտպանունակութեան, անվտանգային համակարգի, ցաւօք սրտի, անդառնալի մի փլուզման, կորստի արձանագրումով։ Խօսքը ՀՀ ԶՈՒ 3-րդ բանակային կորպուսի անցած լեգենդար ուղու մասին է, ինչը ստւերւեց՝ Տաւուշում սահմանազատման անւան տակ յանցաւոր կերպով ռազմավարական բազում դիրքերի, մարտական յենակէտերի ու առաջնագծի զիջումով։ Այստեղ գրւել էր պատմութիւն, այն գծւել էր հերոսականութեամբ, որը գաղտագողի յանձնւեց թշնամուն։ Երկրի ներկայիս քաղաքական ղեկավարութիւնն իր գործողութիւններով, քայլերով շարունակեց բանակի հեղինակազրկումը։

Այն յայտարարութիւնները, որ հնչեցրել է այս տարի Նիկոլ Փաշինեանը՝ «Զինւած ուժերը չեն անվտանգութեան առաջին գլխաւոր երաշխաւորը», «բանակը պէտք է տեղաւորւի, այսպէս կոչւած, խաղաղութեան օրակարգում», ինչպէս նաեւ՝ իր եւ այլ պաշտօնեաների կողմից հնչած «մենք ՀՀ օկուպացւած տարածքները ռազմական ճանապարհով յետ չենք բերելու» ձեւակերպումն անդառնալի հարւածներ են հասցրել բանակի բարոյահոգեբանական վիճակին, որի հետեւանքը դեռ ցաւալիօրէն զգալու ենք: Այսքանը»,- ասաց Գեղամ Մանուկեանը:

Յաւելենք, որ Տաւուշում ապօրինի սահմանազատման գործընթացի օրերին 3-րդ բանակային կորպուսի հրամանատարն Ալեքսանդր Ցականեանն էր, ում նախ գեներալի կոչում տւեցին, այնուհետեւ նշանակեցին Զինւած ուժերի գլխաւոր շտաբի օպերատիւ գլխաւոր վարչութեան պետի առաջին տեղակալ:

Յ.Գ. – Գեղամ Մանուկեանի եղբայրը՝ գեներալ-մայոր Դաւիթ Մանուկեանը, ով մինչեւ վերջ մնաց Արցախում, 2023 թւականի սեպտեմբերի 19-ի ադրբեջանական «հակաահաբեկչական» գործողութիւններից եւ Արցախի հայաթափումից յետոյ գերի վերցւեց եւ այսօր գտնւում է Բաքւի բանտում եւ մեղադրւում ալիեւեան ռեժիմի կողմից, ինչի հետ հաշտ է Փաշինեանի իշխանութիւնը:

Մաղթենք, որ ի դէմս հայկական բանակի գեներալ Դաւիթ Մանուկեանի՝ Բաքւի բանտերում պահւող Արցախի նախկին ռազմաքաղաքական ղեկավարները վերադառնան Հայաստան: