Արման Թաթոյեան. «ՔՊ-ի քարոզչամեքենայի հիմնարար «առաքելութիւն» է դարձել թշնամանք ու անհանդուրժողականութիւն բորբոքելը»

«ԱԼԻՔ» – ՔՊ-ի քարոզչամեքենայի հիմնարար «առաքելութիւն» է դարձել թշնամանք ու անհանդուրժողականութիւն բորբոքելը, մարդկանց մոլորեցնելը: Այս մասին իր ֆէյսբուքեան էջում գրել է  ՀՀ նախկին ՄԻՊ Արման Թաթոյեանը։

«ՔՊ վերնախաւի համար այս գործելաոճը դարձել է իշխանութեան մնալու գրաւական եւ մեր հասարակութիւնն ու պետութիւնը կործանող ախտ:

Աւտորիտար պետութեանը յատուկ այսպիսի քարոզչութիւնը վտանգաւոր է ինչպէս երկրի ներսում կայունութեան, այնպէս էլ միջպետական յարաբերութիւնների համար: Հաղորդում է News.am:

Որեւէ պետութեան հետ յարաբերութիւնները, յատկապէս դաշնակցային յայտ ներկայացնելը պահանջում է այդ պետութեան հետ յարաբերութիւններում ՀՀ շահերի առաւելագոյն ու իրական իրացում: Պէտք է ամէն պայմանաւորւածութիւն կամ լուծում ամրապնդւի «գետնի վրայ» գործող կոնկրետ մեխանիզմներով: Այդ ամէնն էլ պէտք է պատշաճ պարզաբանւի հանրութեանը:

Միանգամայն կողմ լինելով հայ-ամերիկեան յարաբերութիւնների զարգացմանը այսօրւայ ուսումնասիրութիւնները վկայում են, որ ՔՊ-ն իր քարոզչութեամբ նպաստում է երէկւայ միջոցառման հանրային ու միջազգային խեղաթիւրւած ընկալմանը եւ նենգափոխում է հայ-ամերիկեան յարաբերութիւնների բովանդակութիւնը` ի վնաս ՀՀ շահերի:

Ըստ այդմ, իրական դիւանագիտութեան փոխարէն ստացւում է թշնամանքի ու անհանդուրժողականութեան ՔՊ քարոզչութիւն պատմական, տնտեսական ու այլ թելերով կապւած պաշտօնական դաշնակցի` ՌԴ-ի կամ ցանկացած երկրի դէմ առհասարակ, ինչպէս նաեւ յարաբերութիւններում լարւածութեան խորացում:

Այս ամէնն այն դէպքում, երբ ՔՊ-ն է իր իշխանութեան ժամանակահատւածում աւելի խորացրել տնտեսական կապերը ՌԴ-ի եւ ԵԱՏՄ-ի հետ` «գետնի վրայ» գործող կոնկրետ մեխանիզմներ ներդնելով կամ գործողներն ամրապնդելով:

Այս պայմաններում ՀՀ պետական շահերին օրգանապէս է հակասում ՔՊ-ի նման քարոզն ու գործունէութիւնն առհասարակ:

ՔՊ-ի մանիպուլիացիաներ թոյլ չտալու համար յատուկ եմ շեշտում իմ հիմնարար համոզմունքը` Հայաստանի անվտանգութեան ու առաջընթացի համար պէտք է ղեկավարւել [իրական] ժողովրդավարութեան ու իրաւունքի գերակայութեան, մարդու իրաւունքների ու ազգային արժէքների պաշտպանութեան գերակայութեամբ»,- գրել է նա։