Մետաքսէ Յակոբեան. «Արտգործնախարարը «մոռացաւ» նշել, որ Արցախը յանձնեցին իրենք»
«ԱԼԻՔ» – Արցախի Հանրապետութեան Ազգային ժողովի «Արդարութիւն» խմբակցութեան պատգամաւոր Մետաքսէ Յակոբեանը ֆէյսբուքեան իր էջում գրում է.
«ՀՀ արտգործնախարարը «մոռացաւ» նշել, որ Արցախը յանձնեցին իրենք, երբ ՀՀ վարչապետը չեղարկեց ընթացող բանակցային գործընթացը, աղաղակեց՝ «Արցախը Հայաստան է եւ վերջ», երբ մերժեց մեր ինքնորոշման իրաւունքը, երբ միակամ որոշեց, որ աւելի լաւ է հազարաւոր զոհերի արդիւնքում յանձնի Արցախը, երբ Պրահայում յայտարարեց, որ Արցախն Ադրբեջան է, երբ, երբ, երբ…ցաւով պիտի նշեմ, որ այլեւս օրինաչափութիւն է դարձել իրենց յօրինածը, սուտը, կեղծիքը վստահաբար պնդելը, այնպէս ինչպէս «Սոֆիայում Արցախի եւ Ադրբեջանի ներկայացուցիչների հանդիպումը Արցախի կողմից մերժելը», այնինչ որեւէ հանդիպման առաջարկ Արցախը չի մերժել։ Դրանք չեն կայացել, որովհետեւ Ադրբեջանի հետ նման պայմանաւորւածութիւն իրենք պարզապէս ձեռք չեն բերել։ Անամօթ վստահութեամբ եւ իբրեւ թէ «յաջողութիւն» արտգործնախարարը նշում է, որ իրենց «ջանքերի շնորհիւ» մենք կարող էինք մնալ Արցախում որպէս Ադրբեջանի քաղաքացիներ եւ «իրաւունք ունենալ» խօսել հայերէն։
Իսկ իրականում, այս խեղճուկրակների հետ նոյնիսկ երկխօսութիւն չկայ, իսկ պատերազմի շահառուն կրկին ժողովուրդն է լինելու։ Իսկ իրենք ի՞նչ, ամենաշատը, որ անելու են բոցաշունչ, ոտնկայս իրենց իսկ կենացներն են խմելու, այնպէս ինչպէս Արցախում էին անում. Արարատ Միրզոյեանը լաւ կը յիշի…»:
