Լեւոն Զուրաբեան. «Փաշինեանը հատել է բոլոր գծերն ու սահմանները»

«ԱԼԻՔ» – «Նիկոլ Փաշինեանի կողմից արտադրած տեսանիւթը (AI-ով թէ առանց AI-ի, որեւէ բան չի փոխում), որը հրապարակւել է Հայ Առաքելական Եկեղեցու քայքայման եւ հնազանդեցման նպատակով, երկրի ղեկին կանգնած առաձնեակի բարոյական ազատ անկման մի նոր ապացոյց չէ զուտ»: Այս մասին ֆէյսբուքեան իր էջում գրել է ՀԱԿ փոխնախագահ Լեւոն Զուրաբեանը։

«Եկեղեցու դէմ Փաշինեանի առաջին իսկ հրապարակային գործողութիւններից եւ «դոմփելու» մասին մայիսի 30-ի տխրահռչակ յայտարարութիւնից ի վեր պարզ էր, որ Նիկոլ Փաշինեանն անձամբ յանձնարարել էր պատրաստել եւ յայտարարութեան պահին արդէն ձեռքի տակ ունեցել է ԱԱԾ-ի կողմից ստեղծւած անհրաժեշտ «ապացոյցները», որոնք պէտք է օգտագործւէին եկեղեցաքանդ հետագայ գործողութիւնների մէջ:

Փաշինեանը, սակայն, մի բան չհասկացաւ` «մերկացնելով» իր սեփական ընդդիմախօսներին, նա այսօր մերկացրեց իր անբարոյ ռեժիմի դէմքը, որը չի խորշում Սահմանադրութեան, օրինականութեան, պարկեշտութեան եւ բարոյականութեան որեւէ նորմի ցուցադրական ոչնչացումից: Նա հաճոյքով պղծում է հասարակութեան գիտակցութիւնը, ժողովրդի տարբեր հատւածներ իրար դէմ հանում, թունաւորում հանրային մթնոլորտը:

Ազդարարելով, որ «հոգու աչքերով» անձամբ կընտրի «Համակարգող խումբ` վեհարանը ազատելու եւ կաթողիկոսական նոր ընտրութիւններ կատարելու» նպատակով, Փաշինեանը չարաշահեց վարչապետի պաշտօնական լիազօրութիւնները, խախտեց ՀՀ Սահմանադրութեան 17 եւ 41 յօդւածները, ըստ որոնց Հայ Առաքելական Սուրբ Եկեղեցին անջատ է պետութիւնից եւ օժտւած ինքնավարութեամբ:

Յայտարարելով, որ աջակցում է կարգալոյծ քահանային եւ հոկտեմբերի 26-ին մասնակցելու է նրա կողմից կազմակերպւած պատարագին, հրամայելով ոստիկանութեան անգործութիւնը Հայ Առաքելական Սուրբ Եկեղեցու գործունէութեանը խոչընդոտելու, նրա սեփականութիւնը հանդիսացող տաճարի տարածքը ներխուժելու օրինազանց գործողութիւնների նկատմամբ, սեփական ներկայութեամբ օժանդակելով այս բոլոր ապօրինութիւններին, Նիկոլ Փաշինեանը կատարում է Քրէական օրէնսգրքի 441-րդ, այն է «Պաշտօնատար անձի կողմից իշխանական կամ ծառայողական լիազօրութիւնները կամ դրանցով պայմանաւորւած ազդեցութիւնը չարաշահելը կամ լիազօրութիւններն անցնելը» յօդւածով նախատեսւած յանցանք:

Ստեղծելով եւ հրապարակելով ՀՀ քաղաքացիների մասնաւոր կեանքին վերաբերող նիւթերը, Փաշինեանը նաեւ խախտել է ՀՀ Սահմանադրութեան 31 յօդւածով նախատեսւած «Մասնաւոր եւ ընտանեկան կեանքի, պատւի ու բարի համբաւի անձեռնմխելիութեան» սկզբունքը:

Մի քանի շաբաթ առաջ Փաշինեանն ասում էր «Կառավարութիւնը ես եմ»: Այսօր, կատարելով բոլոր վերոյիշեալ գործողութիւնները եւ ապօրինի յանձնարարութիւններ տալով իրաւապահ մարմիններին, Նիկոլ Փաշինեանն ասում է. «Օրէնքը ես եմ»:

Փաշինեանի գործողութիւններով Հայաստանում, ըստ էութեան, դադարեցւել է Սահմանադրութեան եւ օրէնքների գործողութիւնը, փոխարէնը հաստատւել է Փաշինեանի կամայականութեան ռեժիմ:

Փաշինեանը հատել է բոլոր այն գծերն ու սահմանները, որոնցից այն կողմ աւարտւում են մեր քաղաքացիական ազատութիւնները եւ սկսւում է անձնական իշխանութեան տեռորը:

Սա թոյլ տալ չենք կարող»,- գրել է նա։