Թագուհի Թովմասեան. «Սա թշնամական ագրեսիայի բացայայտ դրսեւորում է»
«ԱԼԻՔ» – ԱԺ «Պատիւ ունեմ» խմբակցութեան պատգամաւոր Թագուհի Թովմասեանը գրել է.
«Այսօր կրկին գրութիւններ եմ ուղարկել իմ միջազգային գործընկերներին` նրանց ուշադրութիւնը հրաւիրելով Ադրբեջանի նախագահ Իլհամ Ալիեւի երէկ (յունւարի 7-ԽՄԲ.) տարածած յայտարարութեան վրայ:
Երէկ նա յայտարարեց, որ «Հայաստանը ֆաշիստական պետութիւն է» եւ պէտք է «վերջ տրւի դրա գոյութեանը»: Նա ընդգծեց, որ «Զանգեզուրի միջանցք»-ը «պէտք է բացւի եւ բացւելու է», ինչը ոչ այլ ինչ է, քան բացայայտ սպառնալիք Հայաստանի տարածքային ամբողջականութեան դէմ:
Այսպիսի յայտարարութիւնները պարզապէս հռետորաբանութիւն չեն. դրանք հանդիսանում են ուղղակի եւ անմիջական կոչեր՝ խախտելու միջազգային իրաւունքի նորմերը, զրկելու Հայաստանի Հանրապետութեանը իր ինքնիշխան իրաւունքներից եւ ուղղակիօրէն սպառնալու խաղաղ բնակչութեան անվտանգութեանը: Սա թշնամական ագրեսիայի բացայայտ դրսեւորում է եւ միջազգային հանրութեան կողմից չդատապարտւելու դէպքում կարող է վերածւել անկանխտեսելի գործողութիւնների»:
