«ԱԼԻՔ» – Դատական համակարգի երկու նշանաւոր դատաւորների դէմ իրականացւած մահափորձի կապակցութեամբ Յեղափոխութեան Գերագոյն առաջնորդը յղած ուղերձով ցաւակցել է դատաւորների նահատակութիւնը:
Այաթ. Խամենէիի ուղերձում մասնաւորապէս նշւած է.
«Գիտնական-մոջահեդ, հոջաթ. Հաջ Շէյխ Ալի Ռազինիի եւ նրա գործընկեր, խիզախ դատաւոր Հաջ Շէյխ Մուհամմադ Մողիսահի կորստի կապակցութեամբ ցաւակցում եմ նրանց հարազատներին ու Իրանի քաջարի ժողովրդին: Նահատակ Ռազինին նախկինում եւս յայտնւել էր չարամիտների թիրախում եւ տարիներ շարունակ կրել էր մահափորձի հետեւանքով վիրաւորում ստանալու ցաւը: Նրա երկու եղբայրները եւս տարիներ առաջ արժանացել են նահատակութեան պատւին»:
Նոյն կապակցութեամբ առանձին ուղերձով ցաւակցել է նաեւ Հանրապետութեան նախագահ դոկտ. Փեզեշքիանը:
Իր ուղերձում Մասուդ Փեզեշքիանը ցաւակցութիւն յայտնելով Թեհրանի արդարադատութեան պալատի դիմաց տեղի ունեցած ահաբեկչութեան հետեւանքով դատաւորների սպանութեան կապակցութեամբ, նշել է. «Անկասկած, Գերագոյն դատարանի այս նւիրւած եւ փորձառու դատաւորների կտրած ուղին, ովքեր կեանքը նւիրել էին ազգային անվտանգութեանն ուղղւած տարբեր յանցագործութիւնների դէմ պայքարին անգնահատելի է, յատկապէս, ժողովրդի իրաւունքների յարգման եւ երկիրը անվտանգ դարձնելու առումով»:
Նշենք, որ Իրանի դատական համակարգի պաշտօնական հրապարակումների համաձայն, շաբաթ՝ յունւարի 18-ի առաւօտեան, Գերագոյն դատարան ներթափանցած անձը ծրագրւած գործողութեամբ մահափորձ է իրականացրել երկու ականաւոր դատաւորների Ալի Ռազինիի եւ Մոհամմադ Մողիսէի դէմ, ովքեր երկարամեայ անցեալ ունէին ազգային անվտանգութեան, լրտեսութեան եւ ահաբեկչութեան դէմ պայքարում:
Աղբիւրի համաձայն յարձակւողը դէպքից անմիջապէս յետոյ ինքնասպան է եղել։ Նախաքննութեան տւեալներով՝ յարձակւողը քրէական գործ չի ունեցել Իրանի Գերագոյն դատարանում:
