Սի Ծինփինը՝ Պուտինին. «Նոր տարում պատրաստ եմ Ձեզ հետ նոր մակարդակի հասցնել չին-ռուսական յարաբերութիւնները»
«ԱԼԻՔ» – Չինաստանի նախագահ Սի Ծինփինը տեսակապի միջոցով բանակցութիւններ է վարել ՌԴ նախագահ Վլադիմիր Պուտինի հետ: Այս մասին ըստ Tert.am-ի՝ յայտնում է ռուսական Interfax-ը։
«Նոր տարում պատրաստ եմ Ձեզ հետ նոր մակարդակի հասցնել չին-ռուսական յարաբերութիւնները եւ դիմակայել արտաքին անորոշութեանը` չին-ռուսական յարաբերութիւններում կայունութեան եւ ստրեսադիմացկունութեան պահպանման հիման վրայ՝ յանուն բոլոր երկրների զարգացման եւ բարգաւաճման, միջազգային արդարութեան եւ հաւասարութեան», – ասել է Սի Ծինփինը:
Չինաստանի ղեկավարի խօսքով՝ «չին-ռուսական յարաբերութիւնները, որոնց առանցքը յաւերժ բարիդրացիութիւնն ու բարեկամութիւնն են, համապարփակ ռազմավարական փոխգործակցութիւնը, փոխշահաւէտ համագործակցութիւնն ու փոխշահաւէտութիւնը, նոր կենսունակութիւն են ձեռք բերում»։
Պուտինն իր հերթին ընդգծել է, որ Մոսկւայի եւ Պեկինի տեսակէտները համընկնում են այն հարցում, թէ «ինչպիսին պէտք է լինեն յարաբերութիւնները խոշոր տէրութիւնների միջեւ»,- գրում է «ՌԻԱ Նովոստի»-ն։
«Ռուսաստանի եւ Չինաստանի համատեղ աշխատանքն օբիեկտիւօրէն կարեւոր կայունացնող դեր է խաղում միջազգային յարաբերութիւններում»,- ասել է նա։
Պուտինի խօսքով՝ Ռուսաստանը եւ Չինաստանը համատեղ հանդէս են գալիս աւելի արդար բազմաբեւեռ աշխարհակարգի կառուցման օգտին: Նա յաւելել է, որ Ռուսաստանը եւ Չինաստանը աշխատում են Եւրասիայում եւ ամբողջ աշխարհում անբաժանելի անվտանգութեան ապահովման շահերից ելնելով։
