Սիրանուշ Սահակեան. «Ռուբէն Վարդանեանը հէնց առաջին նիստում յայտարարել է, որ իրեն մեղաւոր չի ճանաչում»
«ԱԼԻՔ» – Յունւարի 21-ին շարունակւեց Արցախի ռազմաքաղաքական ղեկավարութեան եւ միւս գերիների նկատմամբ դատավարութիւնը: News.am-ը դատավարութեան հետ կապւած մի քանի հարց է ուղղել ՄԻԵԴ-ում հայ գերիների շահերի պաշտպան, փաստաբան Սիրանուշ Սահակեանին:
– Տիկին Սահակեան, երէկ (Յունւարի 22-ին, ԽՄԲ.) շարունակւեց դատավարութիւնը Արցախի ռազմաքաղաքական ղեկավարութեան եւ միւս գերիների նկատմամբ: Փորձում են դատավարութեան ձեւական կողմն ապահովել, հրապարկւում են ցուցմունքներ Արայիկ Յարութիւնեանից: Ադրբեջանական լրատւամիջոցները նաեւ հաղորդեցին, որ փաստաբաններն իրենց պաշտպանեալների խափանման միջոցը տնային կալանքով փոխարինելու միջնորդութիւն են ներկայացրել: Սակայն չի յստակեցւում, թէ ինչ է նշանակում տնային կալանք հայ գերիների դէպքում։ Ինչպէ՞ս էք գնահատում այս ամէնը:
– Այս գործընթացն Ադրբեջանից զատ այլ ատեաններ չեն ընդունելու ու լեգիտիմ չեն ճանաչելու, եւ դատական ակտերը եւս ոչ լեգիտեմ են համարւելու: Սա արհեստական գործընթաց է: Գործ ունենք շինծու դատավարութիւնների հետ, որոնց հիմնական նպատակը Արցախի ղեկավարութեանը պատժելն է յանուն Արցախի պետականութեան իրականացրած գործունէութեան համար: Այս անձանց միջոցով նրանք դատապարտում են Արցախի ինքնորոշման իրաւունքը եւ այդ գործընթացում ներգրաււածութիւն ունեցող անձանց: Եւ ստորացումներն էլ ուղղւած են ոչ միայն քաղբանտարկեալներին, այլ ողջ հայ ժողովրդին: Ցուցմունքների մասով էլ պէտք է նկատի ունենալ, որ դրանք կորզւում են կեանքի սպառնալիքի տակ, գրւում են յատուկ ծառայութիւնների կողմից եւ հարկադրւում են հայ պատանդներին ու գերիներին:
Ինչ վերաբերում է խափանման միջոցը տնային կալանքով փոխարինելու երէկւայ (յունւարի 22-ին) միջնորդութիւններին, ապա այժմ դեռ փորձում ենք հասկանալ խնդիրը:
– Տիկին Սահակեան, Դուք եւ հայկական մի շարք իրաւապաշտպան կազմակերպութիւններ դիմել էիք միջազգային կազմակերպութիւնների, Բաքւում հաւատարմագրւած դեսպանների՝ կոչ անելով մշտադիտարկում իրականացնել դատական գործընթացի նկատմամբ: Տեղեկութիւններ ունէք արդեօք՝ Բաքւում հաւատարմագրւած օտարերկրեայ դիւանագէտներ կամ միջազգային կազմակերպութիւնների ներկայացուցիչներ մասնակցո՞ւմ են դատավարութեանը:
– Արձագանգները դեռ ստացւում են: Տեղեկութիւնն ամբողջացնելուց յետոյ կը հրապարակենք: Բայց արդէն յայտնի են դէպքեր, երբ իրաւապաշտպանները դիմել են Ադրբեջանին, մուտքի թոյլտւութիւն են խնդրել դատական նիստերին ներկայ գտնւելու նպատակով, բայց նրանց մուտքի արտօնագիր չի տրամադրւել:
– Նիստերին ներկայ են լինում սահմանափակ թւով ադրբեջանական լրատւամիջոցներ, որոնք հրապարակում են գրեթէ նոյնաբովանդակ նիւթեր: Արդեօ՞ք ունէք լրացուցիչ այլ տեղեկութիւններ:
– Ռուբէն Վարդանեանի ընտանիքից ինձ հասած տեղեկութիւններով, որը նրանց է փոխանցւել Ադրբեջանում նրա փաստաբան Աբրահամ Բերմանի միջոցով, հէնց առաջին նիստում Ռուբէն Վարդանեանը յայտարարել է, որ իրեն մեղաւոր չի ճանաչում:
Վարդանեանը նաեւ առաջարկել է մէկ րոպէ լռութեամբ յարգել հակամարտութեան զոհերի յիշատակը՝ անկախ ազգութիւնից: Դատաւորը նշել է, որ նման բան օրէնսդրութեամբ նախատեսւած չէ: Վարդանեանն այնուհետ ներկայացրել է երկու միջնորդութիւն՝ գործերի միաւորման եւ գործի նիւթերին ծանօթանալու նպատակով լրացուցիչ ժամանակի տրամադրման վերաբերեալ: Ադրբեջանական լրատւամիջոցները յայտնել էին միայն միջնորդութիւնների մասին:
