Վեհափառ Հայրապետն ընդունեց ՀՅԴ «Նիկոլ Աղբալեան» Ուսանողական միութեան անդամներին
Մայիսի 4-ին, Ն.Ս.Օ.Տ.Տ. Գարեգին Բ եւ Ամենայն Հայոց կաթողիկոսը Մայր Աթոռ Սուրբ Էջմիածնում ընդունեց ՀՅԴ «Նիկոլ Աղբալեան» Ուսանողական միութեան անդամներին՝ ուղեկցութեամբ ՀՅԴ Գերագոյն մարմնի անդամ Գեղամ Մանուկեանի։
Հանդիպմանը պարոն Մանուկեանը Վեհափառ Հայրապետին տեղեկութիւններ փոխանցեց միութեան ստեղծման պատմութեան եւ ներկայ գործունէութեան մասին։
Այնուհետեւ Նորին Սրբութիւնը, ողջունելով եւ իր օրհնութիւնը բերելով միութեան անդամ երիտասարդներին, իր գնահատանքը յայտնեց նրանց հայրենանւէր իրագործումների համար։ Հայոց Հայրապետը նկատեց, որ իւրաքանչիւր հայորդու հայրենասիրութեամբ ու քաջարի ոգով պէտք է իմաստաւորւի յանուն հայրենիքի նահատակւած մեր զաւակների զոհաբերութիւնը, որպէսզի հնարաւոր լինի կերտել անվտանգ, բարօր եւ առաջընթաց հայրենիք։
Նորին Սրբութիւնը վստահութիւն յայտնեց, որ առ Աստւած ամուր հաւատքի, արիութեան եւ միասնականութեան շնորհիւ հայ ժողովուրդը կը կարողանայ յաղթահարել հայրենիքի առջեւ ծառացած մարտահրաւէրներն ու փորձութիւնները։ Այս առնչութեամբ Հայոց Հայրապետը յորդորեց երիտասարդներին լինել միաբան, ամուր կառչած ազգային արժէքներին, ակտիւօրէն ներգրաււել հոգեւոր-եկեղեցական կեանքին, ամուր պահել սէրն ու նախանձախնդրութիւնը հայրենիքի նկատմամբ, առաջնորդւել նախնեաց լուսաւոր օրինակով եւ չտկարանալ մեր երկի առջեւ ծառացած դժւարութիւնների հանդիման։
Հանդիպման վերջում Հայոց Հայրապետը պատասխանեց երիտասարդների հարցերին, որոնք վերաբերում էին Եկեղեցու հոգեխնամ եւ ազգապահպան առաքելութեանը, հայրենիքի առջեւ ծառացած մարտահրաւէրների յաղթահարմանն ուղիներին:
