Վարդան Ոսկանեան. «Իսկ ինչո՞ւ Մասիս սարին յաւակնելու «մեղքի» մէջ չթաթախւած ասորիներին էլ ցեղասպանութեան ենթարկեցին»

«ԱԼԻՔ» – Իրանագէտ Վարդան Ոսկանեանը ֆէյսբուքեան իր էջում գրառում է կատարել՝ հակադարձելով Նիկոլ Փաշինեանի՝ Հայոց Ցեղասպանութեան հարցականի տակ տանող վերջին յայտարարութեանը:

Նա մասնաւորապէս գրել է. «Երբ սովորական հաշւիչի միջոցով փորձում ես կատարել պարզագոյն մաթեմատիկական գործողութիւն, դիցուք՝ ստանալ 5+5-ը որքա՞ն կը լինի եւ մի 5-ի փոխարէն մուտքագրում ես 4, ապա կը ստանաս ոչ թէ 10, այլ 9-ը, ինչն ակնյայտ սխալ արդիւնք է, որովհետեւ ի սկզբանէ սխալ ես մուտքագրել նախնական տւեալը։  

Հիմա՝ մեզանում սխալ «մուտքագրւած» նախնական տւեալից ստացւող սխալ եզրայանգման հիման վրայ փորձ է կատարւում ներդնել արմատապէս սխալ մի յղացք, թէ իբր հէնց մեր «մեղքով» են մեր դէմ թշնամական քաղաքականութիւն վարում Բաքւի բարբարոսական եւ Թուրքիայի էրդողանական վարչախմբերը, եւ եթէ մենք դադարենք «մեղաւոր» լինել, ապա կը հաստատւի «յաւերժական խաղաղութիւն» կամ միգուցէ նոյնիսկ «պրոլետարական համերաշխութիւն»:  

Ըստ տւեալ կոպիտ մուտքային սխալի՝ մեթոդաբար փորձ է կատարւում հրաժարւել այդ «մեղքի» տարրերից, դիցուք՝ Արցախից, Մասիս սարից եւ այլն, մինչդեռ հրաժարումից յետոյ, երբ թւում է, թէ այլեւս «մեղաւոր» չպէտք է լինենք, ստանում ենք թշնամական նկրտումների հերթական չափաբաժինն՝ ի դէմս «Զանգեազուրի», «Ալագեազի» կամ ամբողջապէս «Արեւմտեան Ադրբեջանի» եւ ապշած մտածում՝ «բայց չէ՞ որ մենք արդէն մեղաւոր չէինք»։   

Մինչդեռ սխալի շտկման բանալիներից մէկն, օրինակ՝ մի քանի պարզ թւացող հարցերի պատասխանելն է. իսկ ինչո՞ւ Մասիս սարին յաւակնելու «մեղքի» մէջ չթաթախւած ասորիներին էլ հայերիս նման ցեղասպանութեան ենթարկեցին նոյն այդ Օսմանեան կայսրութիւնում կամ ինչո՞ւ են Արցախին եւ ընդհանրապէս ոչ մի բանի չյաւակնող կովկասեան պարսիկները (թաթերը) պետական ձուլման քաղաքականութեան թիրախ Բաքւի բարբարոսական վարչախմբի համար»: