Իրականութեան ցանկացած խեղաթիւրում դատապարտելի է

Ցաւալի է ՀՀ ԱԺ նախագահի յոյժ պատասխանատու կոչումը ունեցող պաշտօնեայից այդպիսի անպատասխանատու յայտարարութիւններ լսելը Արցախի եւ արցախահայութեան մասին: Նման անհեռատես եւ յաւակնոտ խօսքերը ոչ միայն չեն կարող նպաստել հայրենական կեանքում առկայ խնդիրների լուծմանը, մեզ օդ ու ջրի պէս այդքան անհրաժեշտ ազգային միասնութեան ապահովմանը, այլեւ՝ ճիշտ հակառակը, դրանք առաւելագոյնս խորացնում են մեր ժողովրդի մէջ արհեստականօրէն ներդրւած հատւածականութեան բաժանարար գծերը:

Աւելին, հոգեւոր տեսողութիւն եւ ընկալում ունեցող մարդկանց համար յստակ տեսանելի են այդպիսի վարքագծի բուն պատճառները: Դրախտում առաջին մարդկանց գործած ամենամեծ մեղքը եղաւ ոչ թէ արգելւած պտուղն ուտելը, այլ Աստծոյ հարցմանն ի պատասխան մեղքը իրենց վրայից ուրիշի վրայ գցելը եւ չզղջալը: Այս երեւոյթը ներկայ է մարդկութեան պատմութեան ողջ ընթացքում եւ դրա յաղթահարումը հնարաւոր է միայն քրիստոնէութեան ճանապարհով, որ սովորեցնում է առաջին հերթին տեսնել մեր մեղքը եւ պատասխանատու լինել մեր քայլերի համար: Արցախեան 44-օրեայ պատերազմից յետոյ, Արցախի 9-ամսեայ շրջափակման ընթացքին եւ 2023 թ. բռնի տեղահանումից յետոյ մեր ժողովրդի մի ստւար հատւածի մօտ ցաւալիօրէն արմատացել է մեղքն ու պատասխանատւութիւնը իրենցից հեռացնելու կործանարար մօտեցումը, ինչի համար հիմք են ծառայել ամենաբարձր մակարդակով բազմիցս արւած նման անհեռատես ու պառակտիչ յայտարարութիւնները, իսկ ԱԺ նախագահի վերջին յայտարարութիւնը ընդամէնը թարմացումն էր վերոնշեալ մօտեցման:

Հարկ չենք համարում մանրամասն կերպով վերստին անդրադառնալու, թէ 9-ամսեայ շրջափակման նեղութիւնները կրած մեր ժողովուրդը ինչպիսի հերոսական դիմադրութիւն ցոյց տւեց 2023 թ․ սեպտեմբերի 19-ին, որովհետեւ համաձայն սուրբգրային խօսքի՝ «Ով աչք ունի տեսնելու, կը տեսնի», իսկ ով ցանկութիւն չունի իրականութիւնը տեսնելու, երբեք էլ չի տեսնի: Բայց ամենամեծ ցաւն այն է, որ իրականութիւնը լաւագոյնս իմացող, 2023 թ. Արցախին օգնելուց պաշտօնապէս հրաժարւած անձինք չեն վարանում վերստին խեղաթիւրելու իրականութիւնը՝ նորից ու նորից աղ լցնելով հայրենազուրկ արցախցիների չսպիացած վէրքերին, անտեսելով նաեւ 2023 թւականին նահատակւած հարիւրաւոր մեր տղաների սխրանքը:

Աղօթում ենք, որ Աստւած իմաստութիւն տայ մեր ժողովրդին, որպէսզի ոչինչ ու ոչ ոք պատճառ չդառնան արհեստական լարւածութեան ու իրար հանդէպ անհանդուրժողականութեան: Ինչքան որ զօրանայ սէրը, ներողամտութիւնը եւ միասնութիւնը մեր հայրենիքում, այնքան աւելի շուտ կը կատարւեն մեր բոլոր նւիրական իղձերն ու երազանքները, որը վստահ ենք, որ ամէն մի հայի ցանկութիւնն է:

ՀԱՅ ԱՌԱՔԵԼԱԿԱՆ ԵԿԵՂԵՑՈՒ ԱՐՑԱԽԻ ԹԵՄ

12 փետրւարի 2025 թ.