Վելայաթի. «Իրանը թոյլ չի տայ, որ իր տարածաշրջանային կապերը խաթարւեն անպատասխանատու յայտարարութիւններով»
Իրան-Թուրքիա բանաւէճը շարունակւում է
«ԱԼԻՔ» – Իրանի գերագոյն առաջնորդ այաթ. Խամենէիի աւագ խորհրդական Ալի Աքբար Վելայաթին խստօրէն քննադատել է Թուրքիայի արտգործնախարարի Իրանի հասցէին արած վերջին արտայայտութիւնները։ Այս մասին է տեղեկացնում ՄԵՀՐ-ը։
«Թուրքիայի որոշ պաշտօնեաներ պէտք է հասկանան, որ անհիմն եւ միջամտողական յայտարարութիւնների կրկնութիւնը չի ծառայում երկու երկրների երկկողմ յարաբերութիւններին ու շահերին։ Իրանը ոչ մի երկրի թոյլ չի տայ անպատասխանատու յայտարարութիւններով խաթարել տարածաշրջանային պատմականօրէն արմատաւորւած կապերը»,- ընդգծել է Վելայաթին։
Խամենէիի խորհրդականն ընդգծել է, որ Իրանը հնագոյն քաղաքակրթութեամբ հզօր երկիր է եւ մշտապէս աշխատել է տարածաշրջանային անվտանգութեան ու համագործակցութեան ամրապնդման ուղղութեամբ։
«Իրանի Իսլ. Հանրապետութիւնը միշտ հաւատարիմ է մնացել փոխադարձ յարգանքի եւ այլ երկրների ներքին գործերին չմիջամտելու քաղաքականութեանը։ Մենք ակնկալում ենք, որ Թուրքիայի պաշտօնեաները կը պահպանեն դիւանագիտական էթիկան եւ զերծ կը մնան անհիմն մեղադրանքներից»,- ընդգծել է նա։
Վաստակաշատ դիւանագէտը նաեւ ընդգծել է Իրանի կարեւորութիւնը տարածաշրջանում անվտանգութիւն հաստատելու հարցում, միաժամանակ զգուշացրել է Թուրքիային տարածաշրջանում դիրքի եւ ուժի սխալ գնահատականներից:
«Եթէ Թուրքիայում որոշ գործիչներ կարծում են, որ արտասահմանեան ուժերի ազդեցութեան տակ գտնւող սխալ դիրքորոշումները կրկնելով՝ կարող են թուլացնել Իրանի դիրքերը տարածաշրջանում, նրանք խորապէս սխալւում են»,- յաւելել է նա։ «Պատմութիւնն ապացուցել է, որ Իրանն անդրդւելի է իր սկզբունքներում եւ համարժէք պատասխան կը տայ անյարգալից վերաբերմունքի ցանկացած դրսեւորմանը»:
Յիշեցնենք, որ աւելի վաղ Թեհրանում Թուրքիայի դեսպանը կանչւել էր ԱԳ նախարարութիւն՝ Թուրքիայի արտգործնախարար Հաքան Ֆիդանի յայտարարութիւնների հարցով:
