Սի Ցզինպինը Չինաստանին եւ Ռուսաստանին լաւ ընկերներ է անւանել
«ԱԼԻՔ» – Չինաստանի նախագահ Սի Ցզինպինը Ռուսաստանի նախագահ Վլադիմիր Պուտինի հետ հեռախօսազրոյցի ընթացքում Չինաստանին եւ Ռուսաստանին իսկական ընկերներ է անւանել, որոնք փոխադարձ աջակցութիւն են ցուցաբերում իրար։ Այս մասին յայտնում է Xinhua գործակալութիւնը։
Չինաստանի ղեկավարը մատնանշել է Պեկինի եւ Մոսկւայի միջեւ պահպանւող յարաբերութիւնների բարիդրացիական բնոյթը։ Նրա խօսքով, Չինաստանն ու Ռուսաստանը «կիսում են խնդիրներն ու դժւարութիւնները՝ հասնելով ընդհանուր զարգացման»։
Ինչպէս պարզաբանել է Սի Ցզինպինը ՌԴ նախագահ Վլադիմիր Պուտինի հետ հեռախօսազրոյցի ժամանակ, Չինաստանի համագործակցութիւնը Ռուսաստանի հետ ուղղւած չէ որեւէ երրորդ կողմի դէմ։ Նա ընդգծել է, որ երկու պետութիւնների յարաբերութիւնները ենթակայ չեն արտաքին միջամտութեան։
«Չինաստանի եւ Ռուսաստանի զարգացման ռազմավարութիւնները եւ արտաքին քաղաքականութիւնը նախատեսւած են երկարաժամկէտ հեռանկարի համար։ «Անկախ միջազգային իրավիճակի փոփոխութիւններից՝ չին-ռուսական յարաբերութիւնները կը զարգանան հանգիստ»,- գործակալութիւնը մէջբերում է Չինաստանի ղեկավարի խօսքերը, որը նաեւ նշել է, որ այդ յարաբերութիւնները կայունութիւն եւ դրական էներգիա են բերում միջազգային յարաբերութիւններին։
Այս մասին տեղեկացնում է news.am-ը:
