ՄԱԿ-ում Իրանի գրասենեակ. Իրանը չի մասնակցելու իր միջուկային խաղաղ ծրագրի ապամոնտաժմանն ուղղւած որեւէ բանակցութիւնների
«ԱԼԻՔ» – ՄԱԿ-ում Իրանի Իսլ. Հանրապետութեան գրասենեակը յայտարարել է, որ եթէ բանակցութիւնների նպատակն Իրանի միջուկային ծրագրի ռազմականացման հնարաւորութեան շուրջ մտահոգութիւնները մեղմացնելու նպատակին հասնելն է, ապա կարելի է այն համարել քննարկելի: Սակայն, եթէ նպատակը Իրանի խաղաղ միջուկային ծրագրի ապամոնտաժումն է, ապա նման բանակցութիւններ երբեք չեն կայանայ,- այս մասին է տեղեկացրել ԻՌՆԱ-ն։
Աղբիւրի համաձայն, ՄԱԿ-ում Իրանի Իսլ. Հանրապետութեան գրասենեակն իր արած յայտարարութեան հետ միասին նշել է, «… ոմանց համար Իրանի խաղաղ միջուկային ծրագրի ապամոնտաժումը պէտք է միայն Օբամայի երեսով տալու համար, ասելով, որ մեզ յաջողւել է անել այն, ինչը Օբաման չէր կարող»:
Յիշեցնենք, որ ԱՄՆ նախագահ Դոնալդ Թրամփը Fox Business լրատւական ալիքին տւած հարցազրոյցում յայտարարել էր, որ նամակով դիմել է Իրանի գերագոյն առաջնորդին եւ յայտնել Իրանի հետ բանակցութիւններ վարելու իր ցանկութեան մասին:
Թրամփը տւած հարցազրոյցում փորձել է ցոյց տալ, որ այս նամակն ԱՄՆ-ի եւ Իրանի միջեւ առաջին նշանակալից փոխգործակցութիւնն է նոր վարչակազմի ստանձնումից ի վեր:
Թրամփը յայտարարել էր, որ ցանկանում է բանակցել Իրանի հետ միջուկային նոր համաձայնագրի շուրջ՝ պնդելով. «Ինչ-որ բան պէտք է անել, քանի դեռ Իրանը չի հասել միջուկային զէնքի ստեղծմանը»:
