Րաֆֆի Յովհաննիսեան. «Իսկ մեր փոքրիկի ժամանակը՝ վաղուց եւ հիմա, սպառւել է»

Մի նայէք «խաղաղութեան համաձայնագրի» առթիւ օտար պետութիւնների խրախուսական խօսքին։ Ո՛չ այդ խօսքը, ո՛չ էլ բուն տեքստը կապ չունեն արժանապատիւ, տեւական եւ իսկական խաղաղութեան հետ։ Այս մասին յայտարարութիւն է տարածել «Ժառանգութիւն» կուսակցութեան առաջնորդ Րաֆֆի Յովհաննիսեանը:

Նա, մասնաւորապէս, նշել է. «Անարդարութիւնն ու անիրաւութիւնը «օրինակարգող» որեւէ նման նախապայմանագիր բերելու է, առանց բացառութեան, յանձնւող կողմի ամբողջական կործանման եւ/կամ նոր պատերազմի ու տարատեսակ վերջնական կորուստների։

Նա, ով առանց լիազօրութեան իւրացրել ու հեղինակազրկել է ուրիշին պատկանող «Նոր Հայաստան» մաքրամաքուր գաղափարը, հիմա էլ պղծում է «Իրական Հայաստանի» բուն իմաստն ու առաքելութիւնը։

Իրական Հայաստանը, նոյնիսկ ամենադժւար հանգամանքում, հետապնդում եւ պաշտպանում է իր ազգային, պետական ու քաղաքացիական իրաւունքները, ոչ թէ դրանք միանձնեայ զիջում, վաճառում կամ նւիրաբերում է:

Զոր օրինակ՝

*Բռնազաւթւած Արցախի ժողովրդի ինքնորոշման ու վերադարձի երաշխաւորւած իրաւունք.

*ռազմագերիների ազատ արձակման անմիջական իրաւունք.

*սեփական Սահմանադրութեան ստեղծման եւ պահպանման, ուստիեւ սեփական ինքնիշխանութիւնն ու ամբողջականութիւնը բոլոր միջոցներով ապահովելու իրաւունք.

*դատական եւ այլ եղանակներով՝ սպանւած, խոշտանգւած, գլխատւած ու բռնաբարւած քաղաքացիների կեանքի եւ քաղաքակրթական ոչնչացւած ժառանգութեան համար անհատական ու հաւաքական հատուցման, ինչպէս նաեւ օտար ռազմական յանցագործներին ու ներքին դաւաճաններին պատասխանատւութեան ենթարկելու իրաւունք.

*սեփական պաշտպանութիւնն ու անվտանգութիւնը լիարժէք կեանքի կոչելու ինքնիշխան իրաւունք.

*Մինսկի խմբի եւ այլ ատեաններով միջազգային-դիւանագիտական «սուբիեկտ» մնալու իրաւունք:

Այս եւ այլ իրաւունքների համապարփակ իրացումը հէնց Իրական Հայաստանի սահմանադրական պարտքն ու պարտականութիւնն է։

Իսկ սա դեռ սկիզբն է։ Եթէ թոյլ տանք ներկայ ընթացքը, դառնալու ենք Վայմար, աւելի ճիշտ՝ միւնխէնեան Չամբերլին, ով Հիտլերի աչքերի մէջ նայեց ու տեսաւ «խաղաղութիւն»։

Արդի Հայաստանում պատերազմի եւ ինքնախորտակման տանող յայտնի համաձայնագիրը խփւել է գոյութենական սպառնալիքի ներքոյ, եւ նոյն միջազգային իրաւունքի ուժով առ ոչինչ է։

Հարեւան, թէ ոչ՝ այլ երկրները թող ինքնուրոյն լուծեն իրենց բռնապետների հարցը, իսկ մեր փոքրիկի ժամանակը՝ վաղուց եւ հիմա, սպառւել է։

Իհարկէ, նա կը շարունակի թշնամասէր, թշնամական իր արշաւները։ Բայց «վհատելու չէ, վերջ կունենան, կուգան ու կերթան»։

Ի գործ:

Լուրը հաղորդել է Yerevan.today-ը: