Հայաստան - ԱրցախՔաղաքական

Միքայէլ Սրբազան. «Գիւմրեցին համարձակ քայլ արեց, այժմ պէտք է գործընթաց սկսել նաեւ Երեւանում»

«ԱԼԻՔ» – Գիւմրեցին համարձակ քայլ արեց, վտանգեց սեփական բարեկեցութիւնը՝յանուն Հայաստանի, հետեւաբար, պէտք է սկսել գործընթաց նաեւ Երեւանում: news.am-ի հետ զրոյցում նման կարծիք յայտնեց Շիրակի թեմի առաջնորդ Գերաշնորհ Տէր Միքայէլ արքեպիսկոպոս Աջապահեանը:

«Եթէ գործընթաց չսկսւեց առաջիկայ մէկ-երկու ամսում, ՔՊ-ն կը յղփանայ եւ ամենայն հաւանականութեամբ, կը սկսի պատժիչ գործողութիւններ: Այսօր ընդդիմութիւնը կամ պէտք է թողնի հեռանայ, կամ գործ անի: Եթէ իշխանութիւնները պրոցես չտեսան, կը սկսեն վրէժ լուծել եւ հնարաւոր է՝ շարքային գիւմրեցին գլխին տայ, թէ ինչ սխալ արեցի»,- ասաց Միքայէլ Սրբազանը:

Նա անդրադարձաւ նաեւ ՔՊ-ականների այն դիրքորոշմանը, թէ Գիւմրիի նորընտիր քաղաքապետը շատ քիչ կը պաշտօնավարի: Ըստ Սրբազանի՝ դա իշխանական շանտաժ է. «Սա յանցագործութիւն է, պետական մակարդակի յանցագործութիւն է: Ո՞նց կարելի է պետական շանտաժով սպառնալ, սա խօսում է այս իշխանութիւնների կատարեալ անբարոյականութեան մասին»:

Միքայէլ Սրբազանը նաեւ անդրադարձաւ վարչապետի խօսնակ Նազելի Բաղդասարեանի ապրիլի 4-ի գրառմանը: Սրբազանը տարակուսած է՝ ինչ լծակների է տիրապետում Բաղդասարեանը, որ նման յայտարարութիւններ է անում: Նշենք, որ Փաշինեանի խօսնակն երէկ մասնաւորապէս գրել է. «Ու Աստւած չանի՝ մէկի գլխից մազ ընկնի»:

«ՆԳՆ-ն է իրեն ենթակա՞յ, թէ՞ ԱԱԾ-ն, ինքը մեր բոլոր գիւմրեցիների մազերը հաշւե՞լ է, որ գիտի՝ կը պակասի, թէ ոչ: Այդ աղջիկը պիտի հասկանայ՝ ինչ է խօսում, նման բան նոյնիսկ ՆԳ նախարարն է սխալ, որ ասի»,- ասաց նա:

Related Articles

Back to top button