«Հայրենիք» կուսակցութիւն. «ՔՊ-ի հետ որեւէ ձեւաչափով համագործակցութիւնը բացառւում է

«ԱԼԻՔ» – «Մեր քաղաքը» դաշինքը ձեւաւորւել է «Հայրենիք» եւ «Միացեալ Հայաստան» կուսակցութիւնների միջեւ՝ Գիւմրի համայնքի աւագանու ընտրութիւններին մասնակցելու նպատակով։ Դաշինքի աւագանու թեկնածուների ցուցակը գլխաւորել է Մարտուն Գրիգորեանը։ Քարոզարշաւի ողջ ընթացքում դաշինքի մաս կազմող կուսակցութիւնները լիովին աջակցել են Մարտուն Գրիգորեանի գլխաւորութեամբ կազմւած աւագանու ցուցակին՝ ներդնելով հնարաւոր բոլոր ջանքերը։ Այս մասին յայտարարութիւն է տարածել «Հայրենիք» կուսակցութիւնը:

««Հայրենիք» կուսակցութեան տեսակէտը արտայայտւած է եւ համահունչ է Մարտուն Գրիգորեանի հրապարակային յայտարարութեանը՝ Վարդան Ղուկասեանին համայնքի ղեկավար ընտրւելու նպատակով քւէներ ապահովելու, ՔՊ վերարտադրութիւնը Գիւմրիում թոյլ չտալու մասին։

Կուսակցութիւնը յայտարարում է՝ ՔՊ-ի հետ որեւէ ձեւաչափով համագործակցութիւնը բացառւում է։

Ինչ վերաբերում է դաշինքի մաս կազմող միւս կուսակցութեան ղեկավարի յայտարարութեանը, ապա այն հնչել է որպէս մասնաւոր կարծիք եւ չի արտայայտում դաշինքի պաշտօնական տեսակէտը։

Մենք այն համոզմանն ենք, որ օրւայ իշխանութիւններին օր առաջ Գիւմրիում եւ ողջ Հանրապետութիւնում իշխանազրկելը բխում է հայ ժողովրդի անվտանգութեան, համախմբւածութեան եւ համերաշխութեան ապահովման գերակայ շահերից»,- նշւած է յայտարարութեան մէջ:

Յիշեցնենք, որ կիրակի Հ1-ի եթերում «Մեծ բանավէճ»-ի ժամանակ «Միացեալ Հայաստան» կուսակցութեան ղեկավար Երւանդ Թարվերդեանը յայտարարել էր, որ ՔՊ-ն պէտք է քաղաքապետի թեկնածու չառաջադրի եւ պէտք է այնպէս անել, որ աւագանու նիստում լինեն տարբեր թեկնածուներ եւ գուցէ հէնց Մարտուն Գրիգորեանն է ընտրւում:

Նշենք, որ Գիւմրիի աւագանու ընտրութիւններում ՔՊ-ի թեկնածու Սարիկ Մինասեանն ստացել է 14 մանդատ, Վարդան Ղուկասեանը՝ 8 մանդատ, Մարտուն Գրիգորեանը՝ 6 մանդատ, Ռուբէն Մխիթարեանը՝ 3 մանդատ եւ «Մայր Հայաստանից» Կարէն Սիմոնեանը՝ 2 մանդատ: ՔՊ-ից բացի միւս ուժերը յայտարարել են, որ կաջակցեն, որ Վարդան Ղուկասեանը դառնայ քաղաքապետ:

Լուրը լաղորդում է news.am-ը: