Արցախի Հանրապետութեան Ազգային ժողովի նախագահի կոչը

Լինելով Արցախի Հանրապետութեան քաղաքացի եւ Ազգային ժողովի նախագահ՝ միշտ պայքարել եմ Արցախի Հանրապետութեան նախագահի, Ազգային ժողովի եւ ուժային կառոյցների՝ որպէս պետականութեան հիմք ներկայացնող ինստիտուտների կայացման ու հզօրացման համար:
Անընդունելի է վերջին օրերին հանրային հարթակներում կեղծ համախմբման կոչերի քողի տակ հանդէս եկող որոշ դէմքերի՝ մեր պետականութեան հիմքերի կազմաքանդմանն ուղղւած քայլերը:
Ես Ազգային ժողովի նախագահի պաշտօնը ստանձնել եմ քաղաքական ուժերի համախոհութեան արդիւնքում: Համոզւած եմ, որ այդ համախմբումը միս ու արիւն է տալու պետականութեան պահպանման վեհ գաղափարին, որի լեգիտիմ ներկայացուցիչներն են նախագահի եւ Ազգային ժողովի ինստիտուտները:

Բոլոր այն քայլերը, որոնք միտւած են սեպ խրելու եւ ընդհանրապէս պետական կառոյցների տարանջատմանն ու հակադրութեանը, բացառապէս թշնամանք են ստեղծում երկրի ներսում եւ ջուր լցնում թշնամու ջրաղացին:

Վստահ եմ՝ այս ծանր օրերին ուժային եւ իրաւապահպան կառոյցների ներկայացուցիչները գիտակցում են պետականութեան պահպանման գինն ու կարեւորութիւնը ու նրանց վստահւած մեր անվտանգութիւնն ու ներքին անդորրի պահպանումը:

Որպէս երկրի քաղաքական ղեկավարութիւնը ստանձնած երկրորդ դէմք՝ ինչպէս ժամանակին մարտի դաշտում անմասն չեմ մնացել պետականութեան ստեղծման գործընթացին, հաւատարիմ եւ հաստատակամ մնալով մեր նահատակների որդեգրած նպատակներին, գիտակցելով ներքին համերաշխութեան կարեւորութիւնը, պատրաստ եմ իմ բոլոր ուժերը ներդնել՝ համատեղ որոշումներ կայացնելու եւ այս իրավիճակից մեր հանրապետութիւնը նւազագոյն վնասներով դուրս բերելու ուղղութեամբ:

Որպէս օրէնսդիր մարմնի ղեկավար, համոզւած եմ, որ ԱՀ Ազգային ժողովը կը ստեղծի բոլոր պայմանները՝ դառնալու ոչ միայն քաղաքական քննարկումների, այլեւ հանրութեան խնդիրները ներկայացնող եւ լուծումներ առաջադրող հարթակ:

Վստահեցնում եմ ձեզ, որ Ազգային ժողովը պատրաստ է հիւրընկալել հանրութեան կառուցողական միտում ունեցող տարբեր շերտերի եւ պատրաստակամ է լսելու բոլորի կարծիքը եւ այն ներկայացնելու թէ´ ԱՀ նախագահին, թէ´ պատկան մարմիններին:

Համոզւած եղէք, որ այս ծանր կացութիւնից դուրս կը գանք մեր հաստատակամ, արդար, անմնացորդ նւիրւածութեան ու համերաշխութեան շնորհիւ:

Կոչ եմ անում բոլորիդ ցուցաբերել զգօնութիւն եւ զսպւածութիւն՝ ի շահ մեր երկրի ու ժողովրդի:

ԴԱՒԻԹ ԻՇԽԱՆԵԱՆ
ԱՀ Ազգային ժողովի նախագահ

«Arfd.am»