Ռուբէն Վարդանեանի շինծու դատավարութիւնը շարունակւել է Բաքւում

«ԱԼԻՔ» – Մայիսի 6-ին Բաքւում շարունակւել է Ռուբէն Վարդանեանի շինծու դատավարութիւնը։ Հաղորդում է News.am-ը:

Ըստ ադրբեջանական լրատւամիջոցների՝ Ռուբէն Վարդանեանի փաստաբան Աբրահամ Բերմանը յայտարարել է, որ 2025 թւականի փետրւարի 6-ի «նիստի արձանագրութեան» ուսումնասիրութիւնից յետոյ պարզւել են «դատական ​​​​կոլեգիային» գանգատ ներկայացնելու հիմքերը։

Փաստաբանը նշել է, որ «դատական ​​նիստի» արձանագրութիւնը չի արտացոլում պաշտպանութեան կողմի միջնորդութիւնները, եւ դա հիմնաւոր կասկածներ է առաջացնում, որ «դատական ​​կոլեգիան» այս գործում օբիեկտիւ եւ անաչառ չի լինի։ Ուստի փաստաբանը վերաքննիչ գանգատ է ներկայացրել «դատարան»։

Ըստ տեղեկութիւնների՝ Ռուբէն Վարդանեանը աջակցել է գանգատին։

Գլխաւոր դատախազի աւագ օգնական Վիւսալ Ալիեւը, արտայայտելով իր վերաբերմունքը գանգատի նկատմամբ, ասել է, որ պաշտպանութիւնն իրաւունք ունի դիտողութիւններ յայտնել «դատական ​​նիստի» արձանագրութեան մէջ ձայնագրութեան ճշգրտութեան եւ ամբողջականութեան վերաբերեալ։ Սակայն, «դատական ​​նիստի» արձանագրութեան մէջ որեւէ տեղեկութիւն չներառելը հիմք չէ դատական ​​​​կոլեգիային գանգատ ներկայացնելու համար։

Ալիեւը «դատարանին» խնդրել է առանց քննարկման թողնել գանգատը։

Գործընթացին մասնակցած «տուժածերը» եւս «դատարանին» խնդրել են չբաւարարել գանգատը։

«Դատարանը» հեռացել է՝ միջնորդութիւնը քննարկելու համար խորհրդակցական սենեակում։

Նիստից յետոյ յայտարարւել է պաշտպանութեան կողմի բողոքի վերաբերեալ «դատարանի» որոշումը։ «Դատարանի» որոշմամբ՝ գանգատը թողնւել է առանց քննարկման։