Վարդան Ոսկանեան. «Հայաստանի Հանրապետութիւնը սպասարկել է ոչ թէ արցախեան հիմնախնդիրն, այլ հէնց հայկական պետականութեան»
«ԱԼԻՔ» – Իրանագէտ Վարդան Ոսկանեանը կոպիտ սխալ է համարել այն տեսակէտը, որ Արցախի կորստից յետոյ անհրաժեշտ է վերանայել Հայաստանի Հանրապետութեան գոյութեան եւ զարգացման տեսլականը: Այս մասին նա գրել է սոցցանցերի իր հարթակներում:
«Վերջերս մեզանում կարելի է հանդիպել, ըստ իս, արմատապէս սխալ մի տեսակէտի, թէ Արցախի կորստից յետոյ պէտք է վերանայել Հայաստանի Հանրապետութեան գոյութեան եւ զարգացման տեսլականն ընդհանրապէս՝ գնալ, այսպէս կոչւած, «չորրորդ հանրապետութեան», որն, ի դէպ, ոմանց ուղեղում, պատկերաւոր ասած, բացառապէս «առատ երշիկի երկիր» է։
Նշւած սխալը գալիս է այն սկզբնապէս ոչ ճշգրիտ ընկալումից, թէ Հայաստանի Հանրապետութիւնն, ի հաշիւ սեփական շահի, տասնամեակներ շարունակ սպասարկել է արցախեան հիմնախնդիրը, ուստի պէտք է վերանայւի մեր պետութեան գործառութային իմաստն ամբողջովին։
Իրականում նման բան չկայ՝ Հայաստանի Հանրապետութիւնը սպասարկել է ոչ թէ արցախեան հիմնախնդիրն, այլ հէնց հայկական պետականութեան եւ Հայկական լեռնաշխարհի արեւելեան անկիւնում՝ Հայաստանի եւ Արցախի հանրապետութիւններում, մնացած հայութեան անվտանգութեան միասնական եւ նոյնական խնդիրը, որը ցանկացած պետութեան առաջնային պարտականութիւններից է։
Այժմ արդէն հէնց Հայաստանի Հանրապետութեան նկատմամբ թշնամական նկրտումների ակնյայտ խորապատկերին պարզ է, որ թշնամու համար առնւազն չի եղել, առանձին վերցրած, Արցախի հարց, այլ եղել է հէնց միասնական հայկական խնդիր, որի արցախեան հատւածի «լուծումից» յետոյ, այժմ հերթը հայաստանեան մասինն է։
Հետեւաբար, Հայաստանի Հանրապետութեան համար անվտանգութեան ապահովման խնդիրը չի փոխւել, այլ զուտ էլ աւելի է բարդացել, իսկ այն լիարժէքօրէն լուծելու համար կայ մէկ ճանապարհ՝ մեզ համար գոյութենական վտանգ ներկայացնող Բաքւի բարբարոսական վարչախմբի հնարաւոր թուլացումը, իսկ լաւագոյն հեռանկարում՝ ամբողջական տապալումը»,- գրել է նա:
