Յակոբ Բադալեան. «Այս օրէնքը ստեղծում է արժեհամակարգային վտանգաւոր նախադէպ բոլոր առումներով, ոչ միայն բանակի»
«ԱԼԻՔ» – «Զինծառայութիւնից փողով ազատւելու վերաբերեալ աղմկայարոյց օրէնքի վերաբերեալ քննարկումներում արժէքային շեշտադրումը արւում է այն ուղղութեամբ, որ բարոյական չէ լեգիտիմացնել ապօրինութիւնը, նաեւ սահմանել բանակից ազատւելու «սոցիալական հիմք»»: Այս մասին ֆէյսբուքեան իր էջում գրել է քաղաքական մեկնաբան Յակոբ Բադալեանը։
Ըստ նրա՝ սրանք, իհարկէ կարեւոր քննարկումներ են:
«Բայց, այստեղ հարցը միայն բանակը չէ: Կրկնեմ, իհարկէ, բանակի ասպեկտը չափազանց կարեւոր ու առանցքային է, սակայն հարցի արժէհամակարգային կողմն ու կարեւոր այլ շերտ եւս:
Ընդհանրապէս, հակասոցիալական, հակահանրային է, երբ պետականօրէն սահմանւում է սոցիալական խտրականութիւն, երբ հարուստ լինելը պետական մակարդակով ընձեռում է հնարաւորութիւն: Այս օրէնքը ստեղծում է արժէհամակարգային վտանգաւոր նախադէպ բոլոր առումներով, ոչ միայն բանակի:
Անթոյլատրելի է այդպիսի նախադէպի ստեղծումը, քանի որ խախտւում է իրաւահաւասարութեան սկզբունքը՝ խախտւում է փողի հիմքով: Վաղը կարող է կայացւել որոշում, որ հարուստներն օրինակ կարող են այս երկրում ունենալ այլ արտօնութիւններ: Չկասկածէք, որ մի հնչեղ եւ «ռեֆորմիստական»» ձեւակերպում կը գտնւի, եւ կը գտնւի սազանդարների մեր շօշափելի բանակ, որ «կը հիմնաւորի» այդ կարեւորագոյն «ռեֆորմի» անհրաժեշտութիւնը:
Ընդ որում, նկատեմ նաեւ, որ ըստ իս տեղին չէ նաեւ համեմատութիւնն օրինակ «հասարակաց տները» օրինականացնելու հետ: Այդտեղ եւս կայ իհարկէ արժէհամակարգային կամ բարոյական նորմերի խնդիր, բայց սկզբունքային իմաստով այդ խնդիրը գտնւում է այլ հարթութեան մէջ՝ մէկը կարող է այս կերպ վերաբերել այդ երեւոյթին, միւսը՝ այլ կերպ, բայց այդտեղ չկայ պետականօրէն անիրաւահաւասարութեան սահմանում՝ հարուստներին փողի հիմքով տրւող արտօնութեան սահմանում:
Հետեւաբար, այս օրինակները համեմատելի չեն: Այստեղ գլխաւոր խնդիրն այն է, որ պետութիւնը օրէնսդրօրէն լեգիտիմացնում է դասակարգային խտրականութիւն»,- գրել է Յակոբ Բադալեանը:
