Արցախի Հանրապետութեան Ազգային ժողովի նախագահ Դաւիթ Իշխանեանը նամակներ է ուղարկել մի շարք երկրների խորհրդարանների խօսնակներին
Արցախի Հանրապետութեան Ազգային ժողովի նախագահ Դաւիթ Իշխանեանը նամակներ է ուղարկել Ռուսաստանի Դաշնութեան Պետդումայի, Իրանի Իսլամական Հանրապետութեան խորհրդարանի, Ֆրանսիայի Հանրապետութեան Սենատի, ԱՄՆ Սենատի, ԱՄՆ Կոնգրեսի, ինչպէս նաեւ Եւրոխորհրդարանի խօսնակներին: Նամակները Երեւանում փոխանցւել են այդ երկրների դեսպանատներին:
Ներկայացնելով Արցախի ժողովրդի իրաւունքներն ու տիրող հումանիտար ճգնաժամը եւ Ադրբեջանի կողմից կիրառւած շրջափակումը՝ ԱԺ նախագահն ընդգծել է, որ Ադրբեջանի նպատակը հայ ժողովրդին սովի մատնելն ու ցեղասպան քաղաքականութեան շարունակութիւնն է:
«Հազարամեակներ շարունակ Արցախը եղել է հայկական քաղաքակրթութեան ամրոց եւ վաղ քրիստոնէութեան կենտրոն: Արցախի ժողովուրդը երկար ժամանակ պայքարել է իր ազատութեան եւ ինքնորոշման համար՝ անյաղթահարելի թւացող ուժերի դէմ՝ Օսմանեան կայսրութեան ցեղասպան ռեժիմի սարսափից մինչեւ խորհրդային իշխանութեան ճնշումը։ Եւ այսօր, չնայած Ադրբեջանի դաժան ռեժիմից բխող մշտական սպառնալիքին, մենք կառուցել ենք ժողովրդավարական հասարակութիւն, որին շատերն են ձգտում»,- շեշտւած է նամակում:
Դաւիթ Իշխանեանը ակնկալում է այդ երկրիների խորհրդարանները քաղաքական ու դիւանագիտական խողովակներով ճնշումներ բանեցնեն ադրբեջանական սպառնալիքները չէզոքացնելու եւ մարդկանց հիմնարար ու անօտարելի իրաւունքների պաշտպանութեան համար:
