«ԱԼԻՔ» – «Իրանի պատասխանը բաց է պահելու դիւանագիտութեան պատուհանը: Այն տրամաբանական պատասխան է ԱՄՆ առաջարկին, եւ կարող է աշխատանքի հիմք հանդիսանալ»: Այս մասին յայտարարել է քաղաքական հարցերով ԱԳ նախարարի տեղակալ Մաջիդ Թախթ Ռաւանչին՝ անդրադառնալով ԱՄՆ առաջարկաների վերաբերեալ Իրանի հնարաւոր պատասխանին:
«Մենք պատասխանն ենք պատրաստում, որը դեռեւս յստակեցւած չէ: Լուրջ աշխատանք է կատարւում, եւ կարծում ենք, որ մեր տւած պատասխանը ողջամիտ է լինելու: Յուսով ենք, որ այն վերջնականապէս կը հաստատւի առաջիկայ մի քանի օրերի ընթացքում եւ կը տրամադրւի Օմանի արտաքին գործերի նախարարին, որի միջոցով այն կը փոխանցւի ամերիկացիներին»,- ԻՌՆԱ-ի հետ զրոյցում ասել է Թախթ Ռաւանչին:
«Մեր պատասխանն անկասկած մէկ նախադասութիւնից կամ մէկ պարբերութիւնից բաղկացած առաջարկութիւն չէ, որը հեշտութեամբ հնարաւոր կը լինի մերժել: Դրա բովանդակութիւնը ցոյց է տալու մեր լրջութիւնը եւ փաստելու է, որ մենք աշխատելու ենք որոշակի սկզբունքների հիման վրայ ու մեր աշխատանքն ունի տրամաբանութիւն: Ներկայացւած իւրաքանչիւր առաջարկ պէտք է ունենայ ներքին տրամաբանութիւն, այն պէտք է ունենայ տրամաբանական սկիզբ եւ աւարտ, որպէսզի դրա տարբեր մասերը չհակասեն միմեանց։
Կարծում ենք, թէ մեր առաջարկը, որը ներկայացնելու ենք տրամաբանական է, եւ կարող է աշխատանքի հիմք հանդիսանալ, եթէ, իհարկէ, միւս կողմը բաւարար քաղաքական կամք ցուցաբերի»,- ասել է ԱԳՆ տեղակալը՝ նշելով, որ Իրանի առաջարկը կարող է հնարաւոր համաձայնութեան հիմք հանդիսանալ, որի դետալների շուրջ աւելի մանրամասն բանակցութիւններ անհրաժեշտ կը լինեն:
«Եթէ մեր մատնանշած առաջարկը հիմք հանդիսանայ, կը ստացւի համաձայնագիր, որը կը բաւարարի երկու կողմին էլ»,- ամփոփել է Թախթ Ռաւանչին:
