Ռուբէն Վարդանեանի «դատավարութիւնը» Բաքւում շարունակւել է. «դատարանը» մերժել է բոլոր միջնորդութիւնները

«ԱԼԻՔ» – Յունիսի 10-ին Բաքւում շարունակւել է Արցախի նախկին պետնախարար Ռուբէն Վարդանեանի «դատավարութիւնը»: Այս մասին ըստ News.am-ի՝ հաղորդում են ադրբեջանական լրատւամիջոցները։

Նիստի սկզբում Ռուբէն Վարդանեանը դատարանին է ներկայացրել եւս մէկ՝ իր ընտանիքի անդամներին «մեղադրական եզրակացութեան» պատճէնը տրամադրելու միջնորդութիւնը եւ խնդրել է քննարկել նախորդ «լսումների» ժամանակ իր ներկայացրած միջնորդութիւնները։

Ռուբէն Վարդանեանի փաստաբան Աբրահամ Բերմանը պաշտպանել է իր պաշտպանեալի դիրքորոշումը։

Բացի դրանից, Ռուբէն Վարդանեանը միջնորդութիւն է ներկայացրել՝ ստուգելու «քրէական գործով» «մեղադրական եզրակացութեան» ռուսերէն թարգմանութեան համապատասխանութիւնը ադրբեջաներէն տեքստին՝ փորձաքննութիւն անցկացնելու միջոցով։

Այսպէս կոչւած Բաքւի «դատարանը» երկու միջնորդութիւններն էլ մերժել է։

Այնուհետեւ ելոյթ են ունեցել «տուժածերը»։

Յաջորդ «դատական» նիստը նշանակւել է յունիսի 17-ին։