Վեհափառ Հայրապետ. «Աստծոյ ողորմութեամբ եւ օգնութեամբ միասին պէտք է յաղթահարենք այս դժւարութիւնները»

«ԱԼԻՔ» – «Զւարթնոց» օդանաւակայանում հաւաքւած ժողովուրդը Ամենայն Հայոց կաթողիկոս Գարեգին Բ-ին դիմաւորել է ծափերով  եւ «Վեհափառ» վանկարկումներով։ Հաղորդում է Yerkir.am-ը:

«Սիրելիներ, գիտենք, որ վարչապետի կողմից հնչեցւած յայտարարութիւնները համընդհանուր վրդովմունք են առաջ բերել: Հաւատում եմ, որ Աստծոյ ողորմութեամբ եւ օգնութեամբ ձեզ հետ միասին խոհեմօրէն, առանց աւելորդ յուզականութեան, ընդվզումների պիտի կարողանանք յաղթահարել այս դժւարութիւնները: Ամուր մնացէք ձեր հաւատքի եւ առ եկեղեցին ունեցած ձեր սիրոյ ու հաւատարմութեան մէջ:

Մենք ձեր այս վերաբերմունքը գնահատում ենք, բայց նաեւ ցանկանում ենք ասել, որ այն առաւել եւս պարտաւորեցնում է մեզ՝ եկեղեցականներիս մեր առաքելութիւնը նոյն նւիրումով ու հաւատարմութեամբ առ ձեզ ու հայրենին մեր իրականացնելու անշեղօրէն, արդիւնաւէտ կերպով:

Մեր յորդորը պիտի լինի, որ այս դժւարին ժամանակներում ամուր ու հաստատուն պահէք միաբանութիւնն ազգային մեր կեանքում: Թոյլ չտանք, որ որեւիցէ կերպ մեր կեանքում տեղ գտնեն այնպիսի արարքներ, որոնք կըվտանգեն ազգային մեր միասնութիւնը: Մենք հաւատում ենք, որ մեր միասնական ջանքերով մեր կարողութիւնների մէկտեղումով պիտի դիմակայենք բոլոր փորձութիւններին եւ արդէն մեր կեանքի բոլոր դժւարութիւնները յաղթահարելով լաւատեսութեան յոյսով ու հաւատով կերտենք մեր ու մեր զաւակների վաղւայ պայծառ օրը: Աստւած օգնական ու պահապան մեր ժողովրդին այսօր եւ յաւիտեանս»,- դիմելով իրեն դիմաւորելու եկած հոծ բազմութեանը՝ ասել է Վեհափառ Հայրապետը։

Հայոց Հայրապետի առաջարկով  հնչել է «Տէրունական աղօթքը», նաեւ կատարւել է «Երկար կեանք տուր Հայրապետին» շարականը։