Միքայէլ Սրբազանին տեղափոխել են ԱԱԾ մեկուսարան
«ԱԼԻՔ» – Շիրակի թեմի առաջնորդ Միքայէլ արքեպիսկոպոս Աջապահեանին, որին Նիկոլ Փաշինեանի դաշնակից, Արամ Զաւէնի Սարգսեանի «Հանրապետութիւն» կուսակցութեան նախկին անդամ, դատաւոր Մասիս Մելքոնեանը կալանաւորել է 2 ամսով, տեղափոխել են ՀՀ ԱԱԾ մեկուսարան։ Այս մասին յայտնում է Yerevan.today-ը։
Միքայէլ արքեպիսկոպոս Աջապահեանի նկատմամբ քրէական հետապնդում է յարուցւել ՀՀ քրէական օրէնսգրքի 422-րդ յօդւածի 2-րդ մասով: Միքայէլ սրբազանը չի ընդունել մեղադրանքը:
Փաստաբանները յայտարարել են, որ մեղադրանքն ակնյայտ անհիմն է եւ չի պարունակում ՀՀ քրէական օրէնսգրքի 422-րդ յօդւածի 2-րդ մասով նախատեսւած յանցագործութեան յատկանիշները:
Յիշեցնենք, որ ըստ ՀՀ Գլխաւոր դատախազութեան՝ Միքայէլ Սրբազանի նկատմամբ 2025 թւականի յունիսի 26-ին կայացւած՝ հանրային քրէական հետապնդում յարուցելու մասին որոշման հիմք է հանդիսացել 2025 թւականի յունիսի 21-ին, զանգւածային լրատւութեան միջոցների ներկայացուցիչներին տրւած հարցազրոյցների ընթացքում իշխանութիւնը զաւթելուն ուղղւած հրապարակային կոչեր հնչեցնելը:
Յատկանշական է, որ ձերբակալման փորձերի եւ հարցաքննութեան այս ամբողջ ընթացքը զուգորդւում էր Նիկոլ Փաշինեանի ոչ կոռեկտ եւ նախաքննութեանն ու դատարանին ուղղորդող գրառումներով:
