Միքայէլ արքեպիսկոպոսի դէմ ձեռնարկւած քայլերը քաղաքական հետապնդում եւ անձնական վրէժխնդրութեան դրսեւորում են
Մայր Աթոռ Սուրբ Էջմիածինը խստօրէն դատապարտում է յունիսի 28-ին Շիրակի թեմի առաջնորդ Տ. Միքայէլ արքեպիսկոպոս Աջապահեանի առնչութեամբ դատարանի կայացրած կալանաւորման եւ ազատազրկման որոշումը, որն ուղղակի հետեւանքն էր վարչապետի եւ իշխանութեան բարձրաստիճան միւս պաշտօնեաների եկեղեցահալած քաղաքականութեան եւ եկեղեցականների դէմ թշնամանքի ու ատելութեան խօսքի։
Փաստերը վկայում են, որ քաղաքական որոշակի ուղղորդմամբ եւ ճնշման ներքոյ դատարանի կայացրած որոշումն անհիմն է եւ ապօրինի։
Միքայէլ արքեպիսկոպոսի դէմ ձեռնարկւած քայլերը ոչ այլ ինչ են, քան դասական իմաստով՝ քաղաքական հետապնդում եւ դրսեւորում անձնական վրէժխնդրութեան իրեն քրիստոնեայ եւ Հայ Եկեղեցու զաւակ նկատող մի անձի, ով նախօրէին իրաւապահ մարմինների ուժերին հրահանգեց պաշարել Մայր Աթոռ Սուրբ Էջմիածինը՝ պախարակելի, աննախադէպ ոտնձգութիւն կատարելով համայն հայութեան հոգեւոր կենտրոնի, եկեղեցականների եւ հաւատաւոր ժողովրդի նկատմամբ։
Յորդորում ենք դատական համակարգին եւ պատկան մարմիններին գործել օրինականութեան դաշտում եւ անյապաղ ազատ արձակել Տ. Միքայէլ արքեպիսկոպոս Աջապահեանին:
Մայր Աթոռ Սուրբ Էջմիածին
