«ԱԼԻՔ» – Հանրապետութեան նախագահի Էթնիկ եւ կրօնական համայնքների հարցերով յատուկ յանձնակատար հոջ. Ալաւին երէկ՝ յուլիսի 1-ին, այցելել է «Արարատ» մարզաւան եւ շրջագայելով տարածքում, ծանօթացել է 12-օրեայ պատերազմին ռմբակոծութեան հետեւանքով վնասներ կրած բաժինների իրավիճակի հետ:
Հոջ. Ալաւիին մարզաւանի մուտքի մօտ դիմաւորել են Թ. Հ. Թ. Թեմական խորհրդի ատենապետ Վարուժ Յովահննիսեանը եւ խորհրդի անդամ Հայրիկ Աղանենաը, Տ. Առաքել աբղ. Գատեհճեանը, Հ.Մ.Ա.Կ.-ի Կենտրոնական վարչութեան նախագահ Սոֆի Ջաղարբէգեանը եւ վարչութեան ու Վարիչ մարմնի միւս անդամները: Աւելի ուշ նրանց է միացել նաեւ պատգամաւոր Արա Շահվերդեանը:
Շրջագայութեան ընթացքում նախագահի յատուկ յանձնակատարը ներկայ գտնւելով «Վաչիկ Ղարաբէգեան» եւ «Սասունցի Դաւիթ» սրահներում, հետաքրքրւել է պատճառւած վնասների չափերի մասին, որոնք ըստ նրա՝ հիմնականում ջարդւած ապակիներով պատուհաններն էին եւ մարզադահլիճի առաստաղին պատճառւած վնասը, որը նրա ձեւակերպմամբ «այս պահին վթարային չէ»:
Սոֆի Ջաղարբէգեանը շնորհակալութիւն յայտնելով հոջ. Ալաւիին մարզաւան կատարած այցի եւ իրավիճակով հետաքրքրւած լինելու կապակցութեամբ, նշել է, որ մարզաւանի ջարդւած ապակիների ու պատուհանների նորոգումից բացի, Կենտրոնական վարչութեան հիմնական մտահոգութիւնը վերանորոգումների գործընթացի ժամանակատար լինելն ու տեւողութիւնն է, ինչպէս նաեւ շինութիւնների հենքի ճարտարապետական տեխստուգման անհրաժեշտութիւնը: Նա յոյս է յայտնել, որ նախագահի յատուկ յանձնակատարի այցը կը նպաստի կարգաւորոման գործընթացի արագացմանը:
Պատգամաւոր Արա Շահվերդեանը եւս ընդգծելով համայնքային աշխատանքներն ու ակտիւութիւնը բնականոն ռիթմ վերադարձնելու կարեւորութեան մասին, այդ հարցում կարեւորել է «Արարատ»-ի դերը՝ յոյս յայտնելով, որ մարզաւանի վթարային վիճակին շուտափոյթ լուծում կը տրւի:
Թ. Հ. Թ. Թեմական խորհրդի ատենապետ Վարուժ Յովհաննիսեանը եւս նշել է, որ Հանրապետութեան նախագահի Էթնիկ եւ կրօնական համայնքների հարցերով յայտուկ յանձնակատարի նման այցը խօսում է նման խնդիրներին շուտափոյթ լուծում տալու հոջ. Ալաւիի յատուկ ուշադրութեան եւ մօտեցման մասին: Վարուժ Յովհաննիսեանը յաւելել է, որ որոշ խնդիրներ աննշան են թւում այնքան ժամանակ, քանի դեռ պոտենցիալ վնասներն ու հետեւանքները ի յայտ չեն եկել: «Կարծում եմ անհրաժեշտութիւն կայ առաստաղի վերանորոգման հարցը եւս շուտափոյթ լուծում գտնի՝ ապակիների հետ միաժամանակ, քանի դեռ անձրեւային չի դարձել սեզոնը, կամ անակնկալ անձրեւներ չեն տեղացել»,- յիշեցրել է նա:
Հոջ. Ալաւին հետաքրքրւելով մարզաւանի պատմութեամբ՝ գեղեցիկ ճարտարապետական կոթող է անւանել «Արարատ»-ը եւ նշել. «Միանգամայն պարզ է, որ մարզաւանն ինչ կարգի նշանակութիւն կարող է ունենալ «շէնացնող» ածականը կրող իրանահայ համայնքի համար»: Նա յաւելել է, որ նման հիմնարկութիւններին հասարակական կեանք վերադարձնելու անհրաժեշտութիւնը անհետաձգելի գործ է, յատկապէս, համայնքների ստեղծագործական ոգին յետ վերադարձնելու առումով:
Յատուկ յանձնակատարը հետաքրքրւել է գնահատւած վնասի չափով, եւ պատարստակամութիւն է յայտնել համապատասխան աջակացութիւն ցուցաբերել մարզաւանի համար ծագած այս խնդրի լուծման կապակցութեամբ:
Վարիչ մարմնի պատասխանատուները «ԱԼԻՔ»-ին յայտնեցին, որ մարզաւան այցելած պատւիրակութեանը, ինչպէս նաեւ մայրաքաղաքի համապատասխան շրջանի քաղաքապետին տեղեկացրել են, որ Վանաք շրջանի համար կարեւորագոյն կանաչ գօտիներից մէկը համարւող «Արարատ» մարզաւանը, մարդուժի պակասի (պատերազմի հետեւանքով երկրից հեռացածների) առումով, այսօր կանգնած է խիստ վտանգաւոր վիճակում՝ կանաչապատ տարածքի եւ հարիւրաւոր հաստաբուն ծառերի ոռոգումն ապահովելու առումով:
Այցի ընթացքում յատուկ յանձնակատարը ներկայ գտնւեց նաեւ ֆուտբոլի դաշտում եւ տեսակցեց Էդմոնդ Բեզիկի հետ: Այդ պահին նա «Արարատ» մարզաւանում գործող «Էդմոնդ Բեզիկ ֆուտբոլային ակադեմիայի» հերթական փորձերն էր վարում իր սաների հետ:
