«ԱԼԻՔ» – Իրանի Իսլամական Հանրապետութեան զինւած ուժերի գլխաւոր շտաբի պետ գեներալ-մայոր Մուսաւին նշելով, որ արդարամտութեան դէմ կռւում Իսրայէլի ռեժիմը ծանր պարտութիւն կրեց, յաւելել է. «Մենք զգուշացնում ենք, որ եթէ կրկին նման ագրեսիայի դիմի, ապա կը ստանայ աւելի ծանր ապտակ, քան նախկինն էր»: Այս մասին է տեղեկացնում ԻՌՆԱ-ն։
Աղբիւրի համաձայն՝ չորեքշաբթի՝ յուլիսի 2-ին, գեներալ-մայոր Սէյէդ Աբդօլրահիմ Մուսաւին Al Mayadeen հեռուստաալիքին տւած հարցազրոյցում ընդգծել է, որ Իրանի ժողովրդից ու զինւած ուժերից՝ Իսրայէլի ռեժիմի կրած ծանր պարտութիւնից յետոյ առաւել քան երբեւէ պարզ դարձաւ, որ Իրանի թշնամիների նպատակը Իրանի Իսլամական Հանրապետութեան համակարգը թիրախաւորելուց բացի, մասնատման նպատակով երկրին հարւած հասցնելն էր, ինչը փորձեցին իրականացնել Իրանի միջուկային ծրագրի խնդրի քօղի ներքոյ։
ԶՈՒ Գլխաւոր շտաբի պետը նաեւ յաւելել է, որ Իրանի զինւած ուժերը չեն օգտագործել ունեցած հնարաւորութիւնների բոլոր կարողութիւնը Իսրայէլի ռեժիմին եւ ԱՄՆ-ի ագրեսիային տրւած պատասխան հարւածների ժամանակ, եւ նշել է. «Իսրայէլի ռեժիմը ստիպւած հրադադար աղերսեց՝ իր գոյութիւնը վերակազմակերպելու համար»։
Գեներալ-մայոր Մուսաւին յաւելել է. «Եթէ նոր ռաունդ լինի, պատերազմի տեւողութիւնը երկար է լինելու, այդ ժամանակ էլ իսրայէլցի յանցագործները մաշկի վրայ են զգալու Իրանի այն հզօրութիւնը, որը մինչ օրս չի կիրառել մեր բանակը»։
Նա ընդգծելով, որ Իրանի կողմից Պաղեստինին եւ Պաղեստինի ժողովրդին աջակցութիւնը Իսլամական Հանրապետութեան հիմնարար սկզբունքներից մէկն է, յաւելել է, որ Իրանը երբեք չի հրաժարւելու իր որեւէ արդարացի սկզբունքից։
