Պուտին. «BRICS-ը տնտեսութեան ոլորտում զգալիօրէն գերազանցում է G7-ին»

«ԱԼԻՔ» – BRICS-ը տնտեսութեան ոլորտում զգալիօրէն գերազանցում է G7-ին: Այս մասին ըստ ռուսական «ՌԻԱ Նովոստի»-ի՝ Ռիօ դէ Ժանէյրոյում BRICS գագաթնաժողովի գլխաւոր լիագումար նիստում յայտարարել է Ռուսաստանի նախագահ Վլադիմիր Պուտինը, որին նա մասնակցում է տեսակապի միջոցով։

ՌԴ նախագահը նշել է, որ BRICS երկրները կազմում են Երկրի ցամաքային տարածքի մէկ երրորդը, մոլորակի բնակչութեան գրեթէ կէսը եւ համաշխարհային տնտեսութեան 40%-ը: Արժոյթի միջազգային հիմնադրամի տւեալներով՝ միաւորման համախառն ՀՆԱ-ն գնողունակութեան համարժէքութեամբ հասնում է 77 տրիլիոն դոլարի։

«Ի դէպ, BRICS-ը այս ցուցանիշով զգալիօրէն գերազանցում է որոշ այլ միաւորումների, այդ թւում՝ «Եօթի խմբին»: Այնտեղ 57 տրիլիոն դոլար է»,- նշել է Պուտինը։

Նշենք, որ BRICS գագաթնաժողովը Ռիօ դէ Ժանէյրոյում տեղի է ունենում յուլիսի 6-7-ին: Բրազիլիայում գտնւող ռուսական պատւիրակութիւնը գլխաւորում է Ռուսաստանի արտաքին գործերի նախարար Սերգէյ Լաւրովը: Յունիսի 25-ին Ռուսաստանի նախագահի օգնական Իւրի Ուշակովը յայտարարել է, որ Պուտինը չի մասնակցի Բրազիլիայում կայանալիք BRICS գագաթնաժողովին:

Նա բացատրել է, որ որոշումը կապւած է Միջազգային քրէական դատարանի (ICC) պահանջների համատեքստում առաջացած դժւարութիւնների հետ։ Բրազիլիայի կառավարութիւնը չի կարողացել յստակ դիրքորոշում ցոյց տալ, որը թոյլ կը տար Պուտինին մասնակցել այդ հանդիպմանը։