Գարեգին Բ. «Թիրախաւորւած է բուն եկեղեցին»

«ԱԼԻՔ» – «Ներկայիս բարդ ժամանակներում հոգեւորականներս կոչւած ենք ոչ միայն հոգեփրկչական մեր առաքելութիւնը իրականացնելու, այլեւ, ցաւալիօրէն, դիմագրաւելու հակաեկեղեցական յարձակումները»: Այս մասին երէկ՝ յուլիսի 11-ին, Մայր Աթոռ Սուրբ Էջմիածնում քահանայից տարեկան ժողովում յայտարարել է Գարեգին Բ Ամենայն Հայոց կաթողիկոսը։

Նա, մասնաւորապէս, նշել է. «Սակայն մենք հաւատքով ու ոգով ամուր ենք մնում՝ համաձայն սուրբգրային խօսքի. «Նեղութիւնները համբերութիւն են բերում, համբերութիւնը՝ փորձառութիւն, փորձառութիւնը՝ յոյս: Յոյսը երբեք չի ամաչեցնում, որովհետեւ Աստծու սէրը սփռւած է մեր սրտերում» (Հռ. 5.3-5)։

Սիրելի հոգեւոր հայրեր, աշխարհում եւ մեր տարածաշրջանում ընթացող զարգացումները լուրջ խնդիրների առջեւ են կանգնեցրել մեր երկիրն ու ժողովրդին: Մենք խորապէս մտահոգւած ենք, որ փոխանակ համայն հայութեանը համախմբելու, հասարակութեան մէջ անջրպետները վերացնելու՝ Հայաստանի իշխանութիւնները շարունակում են արշաւ իրականացնել Եկեղեցու նկատմամբ: Որքան էլ փորձ կատարւի Եկեղեցու դէմ քայլերը ներկայացնելու որպէս առանձին եկեղեցականների հանդէպ ուղղւած գործողութիւններ, այսուհանդերձ, ակնյայտ է, որ դրանք կրում են համակարգային բնոյթ, եւ թիրախաւորւած է բուն Եկեղեցին»։

Վեհափառ Հայրապետը նշել է, որ այդ ամէնի մասին են վկայում վերջին տարիներին Եկեղեցու առաքելութեան համար տարբեր ոլորտներում յարուցւած խոչընդոտներն ու արհեստական դժւարութիւնները:

Նորին Սրբութիւնը նշել է, որ հակաեկեղեցական այս արշաւը, որը լուրջ սպառնալիք է մեր անկախ պետականութեանը, մեր ժողովրդի միասնականութեանը, հարւած՝ մեր երկրի եւ Հայոց Եկեղեցու բարի համբաւին։

Անդրադառնալով նաեւ անցնող օրերին իշխանութեան կողմից եկեղեցականաց միասնականութիւնը խաթարելու եւ միմեանց դէմ տրամադրելու քայլերին՝ Ամենայն Հայոց Հայրապետն արձանագրել է․ «Մեր Սուրբ Եկեղեցում ողջամտութիւնը, եղբայրական ոգին, միաբանութիւնը գերակայ են, քանզի կոփւած են դարերի ընթացքում եւ ուժ են առնում մեր բազմադարեայ պատմութիւնից ու փորձառութիւնից։ Այս բարձր գիտակցութեամբ են մեր Սուրբ Եկեղեցու սպասաւորները դիմագրաւել ու դիմագրաւում փորձութիւնները՝ իւրաքանչիւրն ըստ իր շնորհի եւ կարողութեան ծառայելով Աստծուն, ազգին ու հայրենիքին»։

Ըստ Նորին Սրբութեան՝ Հայոց Եկեղեցին՝ իր հոգեւոր դասով, չի կարող լուռ ու անտարբեր մնալ ազգային ինքնութեանն ու հայրենիքի անվտանգութեանն ուղղւած սպառնալիքների, պատմութեան խեղաթիւրման երեւոյթների հանդիման, անտեսել մեր պետութեան ու ժողովրդի շահերը, չի կարող չբարձրաձայնել արցախահայութեան ոտնահարւած իրաւունքների եւ Բաքւում գերութեան մէջ անօրինաբար պահւող մեր զաւակների նկատմամբ գործադրւող անարդարութիւնների մասին։

Վեհափառ Հայրապետը յորդորել է եկեղեցականներին անվհատ ու ամուր մնալ իրենց ծառայութեան մէջ, առաւել զօրացնել հաւատացելոց հոգեւոր խնամքն ու աղօթական կեանքը, գօտէպնդել մեր ժողովրդին հաւատով, յոյսով ու սիրով՝ զերծ պահելու պառակտումներից․ «Միշտ պահպանեք հոգեւորականի բարձր կոչմանը յարիր կեցւածքը՝ առանց ներքաշւելու կեղծ եւ չարամիտ օրակարգերի մէջ՝ թոյլ չտալով Եկեղեցու հասցէին վիրաւորանք եւ չարախօսութիւն։

Մի վարանէք սադրիչ յարձակումներին պատասխանել ճշմարտութեամբ, արիութեամբ ու սիրով։ Անհրաժեշտ աշխատանք տարէք, որպէսզի ժողովրդի մէջ պատշաճ կերպով ընկալւեն հակաեկեղեցական ընթացքների բուն դրդապատճառները։ Թոյլ չտանք, որ մերժելի այս երեւոյթները, տարատեսակ մոլորեցնող հրապարակումներն ու յայտարարութիւնները որեւէ կերպ թիւրընկալումների տեղիք տան՝ տկարացնելով մեր ազգն ու Եկեղեցին։ Միշտ գիտակցենք, որ բոլոր հայորդիները մեր հոգեւոր զաւակներն են եւ սիրով խրատենք ու ճիշտ ճանապարհի ուղղորդենք նրանց»։